શરતો લાગુ / ભારતમાં 10 કરોડ સિંગલ મહિલા છતાં અમદાવાદમાં ઘર ભાડે મળતું નથી, મિત્રો ઘરે ન આવી શકે; જાણો મહિલાઓની આપવીતી

• અમદાવાદ મેટ્રોસિટીમાં એકલી મહિલાને ભાડે રહેવું મોટો પડકાર!
• મકાનમાલિકોને એકલી મહિલાને ઘર આપવામાં ડર હોય છે 
• આકરી શરતો અને નિયમોનું પાલન કરવું પડે છે 

મેટ્રો સિટી અમદાવાદમાં એકલી રહેતી મહિલાઓ માટે ઘર ભાડે મેળવવું આસાન નથી. સુરક્ષાના નામે ઘરનું ભાડું વધુ ચૂકવવું પડે છે તેમજ મકાન માલિકોના આકરા નિયમો અને કાયદાઓનું પણ પાલન કરવું પડે છે. રાત્રે બહાર નીકળવાથી લઇને ઘર પર થતી અવરજવને લઇને આકરા નિયમોનું પાલન કરવું પડે છે. 

સુરક્ષાના નામે વધુ ભાડું ચૂકવવું પડે છે!
21મી સદીના બદલતા ભારતમાં એકલી મહિલાઓ માટે ભાડે ઘર લેવું સરળ નથી. અમદાવાદ મેટ્રો સિટીમાં એકલી મહિલાઓએ ભાડે ઘર લેવા માટે વધુ મહેનત કરવી પડે છે. સુરક્ષાના નામે ઘરનું ભાડું પણ વધુ ચૂકવવું પડે છે. તેમના પર મકાન માલિકના નિયમો-કાયદાઓ પણ વધી જાય છે. અનેક નિયમો અને શરતો લાગુ કરાય છે જેમ કે રાત્રે 9 અથવા 10 વાગ્યા બાદ ઘરની બહાર ન જઇ શકાય. કોઇ પુરુષ ઘરે ન આવી શકે. વધુ મિત્રો ઘરે નહીં આવી શકે અથવા નાનું-મોટું ફક્શન ન કરી શકાય. 

એકલી રહેતી મહિલાને કેવા પડકારોનો કરવો પડે સામનો?
અમદાવાદમાં રહેતી જાનવી પંડ્યા ફેશન ડિઝાઇનર છે. તેઓ કહે છે કે આ જીવન સારું છે, પરંતુ દરેક પગલે લડવું પડે છે. સિંગલ વુમનને ફ્લેટ શોધવો મોટો પડકાર છે. નાની-નાની વસ્તુઓમાટે મુશ્કેલી થાય છે. અજાણ્યા લોકો પાસેથી સલાહ સાંભળવી પડે છે. દુનિયાની પાંચમી સૌથી મોટી અર્થવ્યવસ્થા એવા ભારતના 2020ના સરકારી રિપોર્ટ અનુસાર, ઉચ્ચ શિક્ષણમાં મહિલાઓની ભાગીદારી વધવાનો દર પુરુષ કરતાં વધુ છે. જો કે વર્લ્ડબેન્કના આંકડાઓ અનુસાર ચીનમાં 62%, અમેરિકામાં 55% તેમજમાં ભારતમાં 20% મહિલાઓ વર્ક ફોર્સનો હિસ્સો છે. છતાં પણ અહીં નોકરી કરતી મહિલાઓને મકાન કે ફ્લેટ શોધવામાં તકલીફ પડે છે. 

લોકોને ડર રહે છે કે કંઇક થશે તો?
ભારતમાં હવે મહિલા દીઠ બે બાળકોનો જન્મ સરેરાશ છે. દરમિયાન યુવતીઓના શિક્ષણપર પરિવાર ખર્ચ કરે છે. તેમાં ગર્વ અને ડર બંને છૂપાયેલા છે. અમદાવાદના પ્રોપર્ટી બ્રોકર ભાવિન વ્યાસ કહે છે કે,  કેટલાક મકાન માલિક જ એકલી મહિલાઓને ઘર આપે છે. મોટા ભાગના લોકોને ડર રહે છે કે કંઇક થશે તો નામ તેમનું આવશે. મકાન આપે છે તે માલિક પણ વધુ ભાડુ વસૂલે છે. ભાડુઆત પર નજર રાખે છે.

આંકડાકીય માહિતી પર પ્રકાશ પાડીએ
મહત્વની વાત છે કે ભારતમાં સિંગલ મહિલાઓની વસતી વધીને 10 કરોડ પહોંચી છે. 2001ની વસતીગણતરી અનુસાર, ભારતમાં 5.12 કરોડ મહિલાઓ સિંગલ હતી. 2011માં 7.14 કરોડ હતી. ભારતમાં 10 કરોડ સિંગલ વુમન છે. એકલી મહિલાઓમાં એ દરેક મહિલાઓ છે જે પોતાની મરજીથી એકલી રહે છે. ત્યારે આઝાદ ભારતના આટલા વર્ષ પછી પણ મહિલાઓને આ પ્રકારની સમસ્યાઓનો સામનો કરવો પડે છે.