અમદાવાદ શહેરમાં ધોધમાર વરસાદ પડ્યો છે. શહેરના દક્ષિણ ઝોનમાં સૌથી વધુ 3 ઈંચ વરસાદ થયો છે. જ્યારે પૂર્વ ઝોન અને દક્ષિણ પશ્ચિમ ઝોનમાં અઢી-અઢી ઈંચ વરસાદ થયો છે. જ્યારે ઉત્તર ઝોનમાં 2 ઈંચ જ્યારે પશ્ચિમ ઝોનમાં પોણા બે ઈંચ વરસાદ થયો છે. આ તરફ ઉત્તર પશ્ચિમ ઝોન અને ઉત્તર ઝોનમાં દોઢ-દોઢ ઈંચ વરસાદ થયો છે.
અમદાવાદ શહેરના પશ્ચિમ વિસ્તારની વાત કરીએ તો ભારે વરસાદથી ઠેર-ઠેર પાણી ભરાયાં છે. જેને લઇને સેટેલાઇટ, શિવરંજની, બોપલ, ઘુમા, સોલા વિસ્તારમાં પાણી ભરાયાં છે. શહેરના અનેક અંડરબ્રિજમાં ભારે વરસાદના કારણે પાણી ભરાઇ ગયા હતા.
ચાંદખેડા, ઘાટલોડિયા, ગોતા, બોપલ, શીલજ, આંબલીગામ, થલતેજમાં વરસાદ પડ્યો છે. જ્યારે સોલા રોડ, મેમનગર, નેહરુનગર, બાપુનગર, ઈસનપુર, નિકોલમાં પણ વરસાદ પડ્યો છે.
અમદાવાદમાં પડેલા એક કલાકમાં વરસેલા ધોધમાર વરસાદથી શહેરમાં અનેક વિસ્તારો પાણીમાં ગરકાવ થઇ ગયા છે. ભારે વરસાદના કારણે લોકોને હાલાકીનો સામનો કરવો પડી રહ્યો છે. શહેરમાં ધોધમાર વરસાદ થતાં નીચાણવાળા વિસ્તારમાં પાણી ભરાયા છે.
અમદાવાદમાં ધોધમાર વરસાદ પડતા ઠેર-ઠેર વરસાદી પાણી ભરાઇ ગયા છે. કાલુપુરમાં ભારે વરસાદથી પાણી ભરાઇ ગયા છે. જ્યારે કાલુપુરના અમદુપુરા પણ પાણીમાં ગરકાવ થઇ ગયું છે.
શહેરના પશ્ચિમ વિસ્તારમાં આવેલા બોડકદેવમાં વરસાદ થતા લોકો નહાવા માટે રસ્તા પર જોવા મળ્યા હતા. જેમાં ખુલ્લી જીપમાં લોકોએ વરસાદની મજા માણી હતી.
અમદાવાદના શાસ્ત્રીનગર વિસ્તારમાં પાણી ભરાઇ જતાં ઠેર-ઠેર ટ્રાફિક જામના દ્રશ્યો જોવા મળ્યાં હતા. એક કલાકમાં વરસાદ થતાં રસ્તાઓ પર પાણી ભરાઇ જતાં વાહન ચાલકોને હાલાકીનો સામનો ભોગવવાના વારો આવ્યો હતો.
જ્યારે હેલ્મેટ સર્કલ પાસે મૂશળધાર વરસાદ પડતાં ઘૂંટણસમા પાણી ભરાયા હતા. જ્યારે આ રોડ પર મેટ્રોનું કામ ચાલી રહ્યું હોવાથી વાહનચાલકોને મુશ્કેલીનો સામનો કરવો પડ્યો હતો.
મણીનગરમાં ધોધમાર વરસેલા વરસાદના પગલે અંડરપાસમાં પાણી ભરાતાં લોકોને ભારે હાલાકીનો સામનો કરવો પડ્યો છે.
અમદાવાદના પશ્ચિમ વિસ્તારમાં પ્રહલાદનગર અને બહેરામપુરામાં પાણી ભરાયાં છે. અમદાવાદ શહેરમાં વીજળીના કડાકા સાથે વરસાદ જોવા મળ્યો છે. જેમાં દક્ષિણ બોપલમાં આવેલી બિલ્ડીંગ પર વીજળી પડી છે. કડાકા સાથે બિલ્ડીંગ પર વીજળી પડી છે. વીજળી પડતાં લોકોમાં ભયનો માહોલ જોવા મળ્યો છે.