છૂટછાટની માગણી / રાઈટ ટુ પ્રાઈવસીનો અર્થ એ નથી કે, કોઈ પોતાના ઘરમાં બેસીને દારૂ પી શકે, દારૂબંધી હટાવવાની અરજી પર સુનાવણી

• દારૂબંધી અંગે ગુજરાત હાઈકોર્ટમાં અરજી
• અરજી પર એડવોકેટ જનરલે ઉઠાવ્યો વાંધો
• "ગુજરાતમાં દારૂની મંજૂરી આપવી યોગ્ય નથી"

રાજ્યમાં દારૂબંધી અંગે ગુજરાત હાઇકોર્ટમાં અરજી કરવામાં આવી હતી. દારૂબંધીના કાયદાને પડકારતી અરજી પર સુનાવણી થઇ હતી. આ અરજી પર એડવોકેટ જનરલે હાઇકોર્ટમાં વાંધો ઉઠાવ્યો હતો. એડવોકેટ જનરલે કહ્યું કે, ગાંધીના ગુજરાતમાં દારૂની મંજૂરી આપવી યોગ્ય નથી. આ અરજી ટકવાપાત્ર નથી. રાઈટ ટુ પ્રાઈવસીનો મુદ્દો હોય તો SCમાં જવા અરજદારને સલાહ અપાઇ છે.  સાથે એવું પણ કહ્યું કે, રાઈટ ટુ પ્રાઈવસીના અર્થ એવો નથી કે,  લોકોને ઘરમાં બેસી દારૂ પીવાની છૂટ આપી શકીએ.

ગુજરાતમાં દારૂ પીવા માટેની પરમિટના આંકડાઓ સામે આવ્યા છે. ગુજરાતમાં દારૂબંધી હોવા છતાં અવારનવાર ગેરકાયદે દારૂનો જથ્થો ઝડપાય છે. મહિલા દિવસ નિમિત્તે દારૂબંધી મુદ્દે વિધાનસભા ગૃહમાં CM રૂપાણીએ નિવેદન આપ્યું હતું કે, દારૂના વેચાણને ગુજરાતમાં કોઈપણ કાળે છૂટ આપી શકાય નહીં. દારૂની છૂટને કારણે મહિલાઓની સુરક્ષા ખતરામાં આવશે. CM રૂપાણીએ પોતાના નિવેદનમાં કહ્યું હતું કે, આજે મહિલાઓ ગુજરાતમાં રાત્રે સ્કૂટર લઈને નીકળી શકે છે. તે ગુજરાતમાં દારૂબંધીને કારણે છે. જો દારૂની છૂટ્ટી અપાશે તો રાજ્યમાં મહિલા સુરક્ષિત નહીં રહે. 

આ સાથે સુનાવણી દરમિયાન કેટલાક આંકડાઓ પણ રજૂ થયા હતા. જેમાં AGએ જણાવ્યું કે, ગુજરાતમાં આશરે 6.50 કરોડ ઉપર વસ્તીમાંથી 21 હજાર લોકોને જ હેલ્થ પરમિટ અપાઈ છે. દર વર્ષે રાજ્યમાં 66 હજાર લોકો પાસે જ દારૂ સલંગ્ન પરમિટ હોય છે. જેમાં હેલ્થ સિવાય વિઝીટર અને ટુરિસ્ટ પરમિટનો સમાવેશ થાય છે. અને દારૂબંધી વિરુદ્ધ અરજીની સુનાવણી દરમિયાન ગાંધીજીના નશામુક્તિ અભિયાન અને રાજ્યમાં 71 વર્ષથી દારૂબંધી હોવાનો ઉલ્લેખ પણ કર્યો હતો. ગાંધીના ગુજરાતમાં કોઈ વ્યક્તિ પોતાના ઘરમાં પણ દારૂ પીવે તે ચલાવી લેવાય નહીં. 

દારૂની પરમિટના ચોંકાવનારા આંકાડ

તો બીજી તરફ દારૂની પરમિટ માટે જે આંકડાઓ સામે આવ્યા છે. તે ચોંકાવનારા છે. રાજ્યમાં દારૂ પીવા માટે પરમિટની અરજીમાં વધારો થઈ રહ્યો છે.  દારૂની મંજૂરી માંગતી અરજીઓ 3 વર્ષમાં બમણી થઇ ગઈ છે. વર્ષ 2019-20માં 3,587 અરજીઓને મંજૂરી અપાઈ હતી. વર્ષ 2017-18માં 1717 અરજીઓને મંજૂરી અપાઈ હતી. સ્વાસ્થ્યના કારણોસર સૌથી વધુ અરજીઓ કરવામાં આવે છે. વર્ષ 2019-20માં 10,189 જૂની મંજૂરીઓ રિન્યુ પણ કરવામાં આવી છે.