રાજ્યસભા / કોંગ્રેસને તેનું આતંરિક પોલિટિક્સ જ હરાવશે, અમારી જીત પાક્કી : નરહરિ અમીન

• ભાજપ ત્રણેય બેઠકો પર વિજય મેળવશે
• કોગેસમાં આંતરિક પોલિટિક્સ છે
• જેના કારણે રિસોર્ટમાં ધારાસભ્યો લઈ જવાની નોબત આવે છે

ગુજરાત કોંગ્રેસમા હાલ યાદવાસ્થળી ચરમસીમાએ છે. આંતરીક લડાઈ તીવ્ર બની છે. ધારાસભ્યોને ફાઈવ સ્ટાર હોટલ અને રિસોર્ટમાં રાખવા પડે છે. જીતવા માટે જરૂરી મતોની ફાળવણીને લઈને પણ વિવાદ સર્જાયો છે. કોંગ્રેસના કયા ધારાસભ્ય કયા ઉમેદવારને ફર્સ્ટ પ્રેફરન્સ અને કયા ઉમેદવારને સેકન્ડ પ્રેફરન્સનો મત આપશે તેને લઈને પણ મતભેદ હોવાનો ઉલ્લેખ કરીને નરહરી અમીને આડકતરી રીતે ઈશારો કરી દીધો છે કે, કોંગ્રેસના ધારાસભ્યો તેમના જ ઉમેદવારોને પાર્ટીએ નક્કી કરેલ પ્રેફરન્સ મુજબના મત નહી આપે.

આવતીકાલે છે ચૂંટણી

રાજ્યસભાની ચૂંટણીમાં સવારે 9 વાગ્યાથી સાંજે 4 વાગ્યા સુધી મતદાન કરવામાં આવશે. સાંજે 5 વાગ્યા પછી મતગણતરી હાથ ધરવામાં આવશે. ગુજરાત વિધાનસભાના ચોથા માટે મતદાન અને મતગણતરી કેન્દ્ર ઊભું કરવામાં આવ્યું છે. મતદાન મથકની બહાર રાજ્ય સભાના પાસે ઉમેદવારોના ફોટા સાથેની માહિતી પણ લખવામાં આવ્યા છે. તો સાથે જ ભાજપ અને કોંગ્રેસના તમામ પાંચ ઉમેદવારોને નંબર આપવામાં આવ્યા છે. મતદાન મથકની બહાર આપવામાં આવેલા ક્રમાંકમાં પહેલો ક્રમાંક તરીકે અભય ભારદ્વાજ ભાજપના ઉમેદવાર છે. આ ક્રમાંકની આધારે બાકીના મેન્ડેટ પ્રમાણે ધારાસભ્યો મતદાન કરશે. 

• પહેલો ક્રમાંક તરીકે અભય ભારદ્વાજ, ભાજપ
• બીજા ક્રમાંકમાં નરહરી અમીન,  ભાજપ
• ત્રીજા ક્રમાંકે શક્તિસિંહ ગોહિલ, કોંગ્રેસ
• ચોથા ક્રમાંકમાં રમીલાબેન બારા, ભાજપ
• પાંચમા ક્રમાંકે ભરતસિંહ સોલંકી, કોંગ્રેસ

કોરોના વચ્ચે સેફ મતદાનની પ્રક્રિયા કરાવાશે

મતદાન મથક અને મતગણતરી સ્થળને સંપૂર્ણ સેનેટાઈઝર કરવામાં બાદ જ મતદાન અને મતગણતરી હાથ ધરવામાં આવશે. આ માટે ખાસ તકેદારી રાખવામાં આવનાર છે. ચૂંટણીમાં કોરોના મહામારીને લઈ ખાસ તકેદારીના પગલાં લેવાશે. વિધાનસભા પ્રવેશ પહેલા મેડિકલ ટીમ તપાસ કરશે. મેડિકલ ટીમ દ્વારા ધારાસભ્યોને થર્મલ ગનથી તપાસ થશે. સભ્યોને સેનિટાઇઝર આપવામાં આવશે. સભ્યો પાસે માસ્ક નહિ હોય તેને માસ્ક પણ આપવાની વ્યવસ્થા કરવામાં આવશે

કાલની ચૂંટણી માટે આ છે તૈયારીઓ

ચૂંટણી પહેલા બે વાર મતદાન સ્થળનું સેનિટાઇઝેશન થશે. સેનિટાઇઝેશન અને મેડિકલ તપાસ માટે આરોગ્ય વિભાગની ટીમ તૈનાત રહેશે. ઉલ્લેખીય છે કે, આ માટે કેન્દ્રીય ચુંટણી પંચ સાથે ગુજરાત ચુંટણી આયોગની વીડિયો કોન્ફરન્સ યોજાઈ હતી. રાજ્યસભાની ચૂંટણી દરમિયાન સ્પેશિયલ ઓબ્ઝર્વર ઉપસ્થિત રહેશે, જે દિલ્હીથી ગુજરાત આવ્યા છે. મતદાનથી મતગણતરીની પ્રક્રિયા પૂર્ણ થાય ત્યાં સુધી સ્પેશિયલ ઓબ્ઝર્વર ઉપસ્થિત રહેશે. સમગ્ર મતદાન પ્રક્રિયાની વીડિયોગ્રાફી કરવામાં આવશે. પહેલી વાર વીડિયોગ્રાફી સાથે સીસીટીવી કેમેરા દ્વારા પણ નજર રખાશે એટલું જ નહીં પણ વેબકાસ્ટિંગ દ્વારા દિલ્હીથી પણ અધિકારીઓ નજર રાખી શકશે.