BIG NEWS / ગુજરાત HCએ કહ્યું, ઈ-મેમો ન ભરનારા સામે FIR કરો, ટ્રાફિક નિયમોના પાલન મામલે કોર્ટની ટકોર

• ગુજરાતમાં ટ્રાફિક નિયમો બની શકે વધારે કડક
• ટૂંક સમયમાં ગુજરાતમાં શરૂ કરાશે ઇ-કોર્ટ પ્રોજેકટ
• ઇ-મેમો ન ભરે તો FIR કરો: ગુજરાત હાઇકોર્ટ

ગુજરાત હાઈકોર્ટના ચીફ જસ્ટિસે રાજ્યમાં ટ્રાફિક નિયમો કડક બનાવવા અંગે સૌથી મોટા સંકેત આપ્યા છે. રાજ્યમાં ટૂંક સમયમાં ઈ-કોર્ટ પ્રોજેકટ શરૂ કરાશે. જેમાં ટ્રાફિક નિયમનું પાલન ન કરનારા વિરૂદ્ધ FIR થશે. ટ્રાફિક નિયમનું પાલન નહીં કરનારા વિરુદ્ધ ઈ-મેમો સાથે ફરિયાદ થશે. ટ્રાફિક નિયમનું પાલન ન કરનારા લોકો વિરૂદ્ધ હાઇકોર્ટે સૌથી મોટી ટકોર કરી છે. હાઇકોર્ટે કહ્યું કે, 'ઈ-મેમો ન ભરનારા સામે FIR કરો.'

અમદાવાદમાં ટ્રાફિકના નિયમનું ઉલ્લંઘન કરતા વિદ્યાર્થીઓ-વાલીઓને દંડ ફટકારાયો

ઉલ્લેખનીય છે કે, રાજ્યમાં ઉનાળુ વેકેશન પૂર્ણ થતાં જ ઓફલાઇન શિક્ષણ શરૂ થતાની સાથે મોટા ભાગના સગીરો ટુ-વ્હીલર વાહનો લઈને શાળાએ જતા થયા છે. જેને લઈને અમદાવાદમાં ગઇકાલથી જ ટ્રાફિક પોલીસ દ્વારા અલગ-અલગ સ્કૂલ અને કોલેજ પાસે ટ્રાફિક ડ્રાઈવ હાથ ધરવામાં આવી તેમજ ટ્રાફિકના નિયમનું ઉલ્લંઘન કરતા વિદ્યાર્થીઓ અને વાલીઓને દંડ ફટકારવામાં આવ્યો છે. જે ટ્રાફિક ડ્રાઈવમાં સગીર વાહનચાલક લાઇસન્સ વગર ટુ-વ્હીલર હાંકતા ઝડપાશે તો 2 હજાર દંડ વસૂલવામાં આવશે. જ્યારે ટુ-વ્હીલર કરતાં મોટું વાહન ચલાવતા ઝડપાશે તો રૂ.3 હજાર દંડ વસૂલવામાં આવશે. જ્યારે પ્રથમ વખત ડાર્ક ફિલ્મ લગાવેલી કાર ઝડપાશે તો 500 રૂપિયા અને બીજી વખત ઝડપાશે તો 1 હજારનો દંડ ફટકારવામાં આવશે.

અમદાવાદમાં આડેધડ વાહન ચલાવતા શખ્સો સામે પોલીસની લાલ આંખ

અમદાવાદમાં હવે અંડર એજ અને ડાર્ક ફિલ્મવાળા વાહનો લઈ નિકળનાર શખ્સોનો રીતસરનો મરો છે કારણ કે પોલીસ દ્વારા વધુ એક વખત ડ્રાઈવનું આયોજન કરાયું છે. અમદાવાદમાં ટ્રાફિકના નિયમોની ઐસીતૈસી કરી આડેધડ વાહન ચલાવતા શખ્સો સામે પોલીસ અવારનવાર લાલ આંખ કરી રહી છે. છતાં આવા શખ્સો અટકવાનું નામ જ લેતા નથી ત્યારે ગઇકાલે બુધવારથી વધુ એક વખત અમદાવાદમાં ટ્રાફિક પોલીસ દ્વારા ડ્રાઈવનું આયોજન કરાયું છે. આ ડ્રાઇવ તા. 15 થી 21 જૂન સુધી યોજાશે. પાંચ દિવસની ટ્રાફીક ડ્રાઇવમાં પોલીસ દ્વારા અંડર એજ વાહન ચાલકો અને ડાર્ક ફિલ્મવાળા વાહનો લઈ નિકળનાર સામે રીતસરનો સપાટો બોલાવવામાં આવશે.નિયમ ભંગ કરનાર સામે દંડ સહિતની કાર્યવાહી કરી કાયદાના પાઠ ભણાવવામાં આવશે.

તાજેતરમાં જ રોંગ સાઈડ અને HSRP નંબર પ્લેટ વિનાના વાહનચાલકો સામે કરાઇ હતી કાર્યવાહી

આ અગાઉ અમદાવાદમાં ગત તા.5 જૂનથી તારીખ 11 જૂન સુધી ટ્રાફિક પોલીસની ડ્રાઇવ યોજાઇ હતી.જેમાં શહેરમાં ટ્રાફિક પોલીસે HSRP નંબર પ્લેટને લઈને ઝુંબેશ શરૂ કરાઇ હતી. એટલે કે શહેરમાં  11 જૂન સુધીમાં HSRP નંબર પ્લેટ વિનાના વાહન ચાલકો સામે કડકમાં કડક કાર્યવાહી કરવામાં આવી હતી. રોંગ સાઈડ અને HSRP નંબર પ્લેટ વિનાના વાહનચાલકો સામે ટ્રાફિક પોલીસ દ્વારા આકરા પગલાં લેવામાં આવ્યા હતા. 

વાહન-મોબાઇલ ચોરીની ફરિયાદ થઇ શકશે ઓનલાઇન

જ્યારે મોબાઈલ ફોન, લેપટોપ કે વાહન ચોરીની ફરિયાદ કરવા માટે પોલીસ સ્ટેશન જતાં હોઈએ, ત્યારે અનેક વખત લોકો આરોપ લગાવતાં હોય છે કે, પોલીસ તેઓની ફરિયાદ નોંધતી નથી. અને ચોરીની ફરિયાદના પુરાવા રજૂ કરવાના નામે અનેક મહિનાઓ સુધી પોલીસ FIR નોંધતી નથી. જો કે, હવે આ તમામ આરોપોનો હવે અંત આવી જશે, રાજ્ય સરકારના ગૃહ વિભાગ દ્વારા 'E-FIR' પ્રોજેક્ટ અંતર્ગત હવે વાહન, મોબાઈલ કે લેપટોપની ચોરીની ફરિયાદ ઓનલાઈન કરી શકાશે. ગૃહ મંત્રાલાય તરફથી એક નોટિફિકેશન જાહેર કરાયું છે. જેમાં વાહન-મોબાઇલ ચોરીના કેસમાં e-FIR કરી શકાશે. તેમ જણાવાયું છે.

'E-FIR' પ્રોજેક્ટ  હેઠળ નાગરિકો ઘરે બેઠાં કરી શકશે ફરિયાદ

'E-FIR' પ્રોજેક્ટ  હેઠળ નાગરિકો ઘરે બેઠાં કે ચોરીના ઘટનાસ્થળે જ પોતાના મોબાઈલ કે કમ્પ્યુટર વડે ઓનલાઈન ચોરીની FIR નોંધાવી શકશે. નાગરિકો પોર્ટલ અથવા સિટીઝન ફર્સ્ટ મોબાઇલ એપથી મદદથી ફરિયાદ કરી શકે છે. જેમાં એપ. પર રજિસ્ટ્રેશન બાદ ચોરીની વિગતો અપલોડ થઇ શકશે, મહત્વનું છે કે, e-FIRના 48 કલાકમાં તપાસ અધિકારી ફરિયાદીનો સંપર્ક કરશે. e-FIR સીસ્ટમાં અપલોડ થતાની સાથે જ અધિકારી અસાઇન થશે. જેની ફરિયાદીને ઇ-મેલ/SMSથી જાણ કરાશે. ઉલ્લેખનીય છે કે,  e-FIR અંગે PIથી કમિશનર સુધીના અધિકારીની જવાબદારી નક્કી કરાઇ છે.