મહામારી / છેલ્લાં 24 કલાકમાં 1145 કોરોનાના કેસ, રાજ્યમાં પ્રથમ વખત 60 હજારથી વધુ ટેસ્ટ છતાં કેસ રોજ જેટલાં

• ગુજરાતમાં છેલ્લા 24 કલાકમાં કોરોનાના 1145 નવા કેસ 
• કુલ મૃત્યુઆંક  2839 પર પહોંચ્યો 

કોરોના વાયરસના કારણે ગુજરાતમાં સતત વધતાં જતા આંકડાએ કેટલાક શહેરોમાં ચિંતા વધારી છે. ગુજરાતના સુરત, અમદાવાદ, રાજકોટ, વડોદરામાં કોરોનાનું સંક્રમણ વધી રહ્યું છે. ત્યારે રાજ્ય સરકારના આરોગ્ય વિભાગે જાહેર કરેલ પ્રેસનોટ પ્રમાણે ગુજરાતમાં છેલ્લા 24 કલાકમાં 1145 કોરોનાના કેસ નોંધાયા છે. 

ટેસ્ટિંગમાં સતત વધારો 

કોરોના વાયરસના કારણે ગુજરાતમાં દિવસેને દિવસે ટેસ્ટની સંખ્યામાં વધારો કરવામાં આવી રહ્યો છે. હાલ રાજ્ય કુલ 61 લેબોરેટરી કાર્યરત છે અને છેલ્લા એક માસથી રેપિડ એન્ટીજન કિટનો પણ ઉપયોગ કરવામાં આવી રહ્યો છે. રાજ્યમાં આજે સૌથી વધુ કોરોના વાયરસના 63,031 ટેસ્ટ કરવામાં આવ્યા છે જ્યારે ટેસ્ટિંગનો કુલ આંકડો  14,78,629 પર પહોંચ્યો છે.     

64,830 દર્દીઓએ કોરોનાને મ્હાત આપી

આજે કોરોનાના 1145 કેસ જ્યારે 1120 દર્દીઓ સાજા થતાં અત્યાર સુધીમાં કુલ 64,830 દર્દીઓએ કોરોનાને મ્હાત આપી છે. આ તમામને હોસ્પિટલમાંથી ડિસ્ચાર્જ કરવામાં આવ્યા છે. આમ ગુજરાતમાં સાજા થવાનો દર 78.98 ટકા થયો છે. આ સાથે જ રાજ્યમાં આજે સુરત, અમદાવાદ અને વડોદરામાં કોરોનાના સૌથી દર્દીઓ વધુ કેસ નોઁધાયા છે.રાજ્યમાં કોરોનાથી છેલ્લા 24 કલાકમાં 17 દર્દીઓના ભોગ લીધો છે. જેને લઇને કોરોનાથી મોતનો આંકડો રાજ્યમાં 2839 પર પહોંચ્યો છે.

ટેસ્ટિંગ વધ્યા પરંતુ કેસ એટલા જ રહેતા ચર્ચાનો વિષય

મહત્વનું છે કે ગત સપ્તાહે પીએમ મોદીએ મુખ્યમંત્રીઓ સાથે વીડિયો કોન્ફરન્સથી મીટિંગ કરી હતી જેમાં ગુજરાત સહિત ચાર રાજ્યોમાં ટેસ્ટ વધારવાની ટકોર કરવામાં આવી હતી. જે બાદ ગુજરાતમાં ટેસ્ટ તો વધ્યાં પરંતુ કેસ પહેલાં જ જેટલાં આવી રહ્યાં હોવાથી લોકોમાં ચર્ચાનો વિષય બન્યો હતો કે આવું કેવી રીતે બની શકે. કારણ કે આંધ્રપ્રદેશ અને અન્ય રાજ્યોમાં જ્યાં 50 હજારથી વધુ ટેસ્ટ રોજ કરાય છે જ્યાં એવરેજ 5000થી વધુ કેસ આવી રહ્યાં છે ત્યારે ગુજરાતમાં આવું કેમ તે ચર્ચાએ જોર પકડ્યું છે.

છેલ્લા 10 દિવસમાં કરવામાં આવેલ ટેસ્ટની વિગત 

રાજ્યના વિવિધ જિલ્લામાં છેલ્લા 24 કલાકમાં નોંધાયેલા કેસની વિગત