થર્મોમીટર / સુરતમાં કોરોનાની એકદમ 'બ્રેક', અમદાવાદમાં 'રફતાર' યથાવત.. શું AMC કેસ 'કાબૂ' કરવામાં ઊણું ઉતર્યુ

• કોરોનાનું થર્મોમીટર
• અમદાવાદ અને સુરતમાં કોરોનાની સ્થિતિ

જો ગુજરાતના 2 સૌથી મોટા શહેરોમાં કોરોનાની સ્થિતિ પર વાત કરીએ તો અમદાવાદ તંત્ર કોરોનાને કાબૂ કરવામા ઊણું ઉતર્યું છે જ્યારે સુરતમાં કોરોના સાવ શાંત પડી ગયો છે. 

અમદાવાદ અને સુરતમાં કોરોના એક સાથે પીક પર હતો 
જો છેલ્લા 15 દિવસના કેસોની સરખામણી કરીએ તો 10 જાન્યુઆરીના રોજ અમદાવાદમાં 1893 કેસ નોંધાય હતા તેજ તારીખે સુરતમાં 1778 કેસ નોંધાયા હતા આ એ સમય છે જ્યાંથી કોરોનાએ બંને શહેરોમાં પીક પકડી હતી. 5 દિવસ બાદ 15 જાન્યુઆરીના રોજ અમદાવાદમાં 2621 કેસ કોરોના પોઝિટિવ આવ્યા હતા જ્યારે સુરતમાં 2215 આમ પાંચ દિવસમાં બંને શહેરોના કેસોમાં કોઈ મોટો તફાવત ન હતો. 

સુરતમાં કોરોનાની બ્રેક, અમદાવાદમાં રફતાર યથાવત
પણ હવે સ્થિતિ બદલાય છે 20 જાન્યુઆરીના રોજ અમદાવાદના ત્રણેય લહેરના રેકોર્ડ બ્રેક 9957 કેસ નોંધાય છે જ્યારે સુરતમાં પણ કોરોના કેસોનો વધારો થાય છે પણ અમદાવાદના કેસથી ઘણું અંતર જોવા મળે છે અને 3709 કેસ નોંધાય છે.25જાન્યુઆરીના દિવસે પણ  અમદાવાદમાં 5386 કેસ તો સુરતમાં 1476 કેસ સામે આવે છે. 10 જાન્યુઆરી એવો સમય હતો કે જ્યારે બંને શહેરોના કેસમાં મોટું અંતર ન હતું પણ આજે આવેલા કેસ પરથી કહી શકાય કે અમદાવાદનું તંત્ર કોરોના પર બ્રેક મારવામાં નિષ્ફળ ગયું છે જ્યારે સામે સુરતના તંત્ર અને લોકોએ પણ કોરોનાને શહેરમાંથી જાણે તગેડી જ મૂક્યો છે. કારણ કે 26 જાન્યુઆરી એટલે કે આજે અમદાવાદ શહેરમાં 5248 કેસ સામે આવ્યા છે જ્યારે સુરત શહેરમાં 843 કેસ જ કોરોના પોઝિટિવ સામે આવ્યા છે. 

આજે રાજ્યમાં  21 લોકોના કોરોનાના કારણે મોત
ગુજરાતમાં ત્રીજી લહેરની પીક ગત સપ્તાહની સરખામણીએ ઘણી ઓછી થઈ છે. છેલ્લા 24 કલાકમાં 14,781 કેસ કોરોના પોઝિટિવ આવતા હવે પરિસ્થિતિ કાબૂમાં હોય તેવુ લાગી રહ્યું છે. આજે સૌથી વધુ અમદાવાદ શહેરમાં 5248 કેસ સામે આવ્યા છે જ્યારે સુરત શહેરમાં 843 કેસ તો રાજકોટ શહેરમાં 944 કેસ, વડોદરા શહેરમાં 2412 કેસ સામે આવ્યા છે. ગાંધીનગરમાં 544 કેસ, ભાવનગર શહેરમાં 233 કેસ સામે આવ્યા છે મહાનગરમાં કોરોના હાલ સુસ્ત પડી રહ્યો છે જ્યારે ગામડામાં કોરોના સંક્રમણ વધુ ફેલાયું હોય તેવુ લાગી રહ્યું છે. કોરોનાને લીધે 21 લોકોના મોત થયા છે. જ્યારે 20,829 દર્દીઓ સાજા થયા છે. રાજ્યમાં કુલ એક્ટિવ કેસની 1,28,192 સંખ્યા સુધી પહોંચી જતાં એક્ટિવ પેસન્ટનો કોરોના ગ્રાફ સતત ઊંચો જઈ રહ્યો છે.