કચ્છ: ભૂજના આર્મી જવાનની AK 47 રાયફલ સહિત જરૂરી સામાન ભરેલી બેગ ચોરાઈ જવાની ઘટના સામે આવી છે. આ અંગે મળતી માહિતી મુજબ ગાંધીધામમાં સયાજીનગરી એક્સપ્રેસમાંથી આર્મીના જવાનની બેગ ચોરાઈ ગઈ હતી જેમાં જવાનના કપડાં સહિત AK 47 રાયફલ પણ સામેલ હતી.
ઉલ્લેખનીય છે કે આ ઘટના અંગેની જાણકારી ગાંધીધામ રેલવે સ્ટેશન સ્થિત પોલીસ સ્ટેશનમાં મળતા ગાંધીધામ પોલીસ સહીત અન્ય અધિકારીઓ તપાસમાં જોડાઈ ગયા હતા અને ઘટનાને ગંભીરતાથી લઈને રેલવેના અધિકારીઓએ પણ તપાસ શરૂ કરી હતી.
જો કે દિવસભરની તપાસ બાદ આખરે રાત્રે સવા દસ કલાકે બાતમીના આધારે પોલીસને બેગ મળી હતી. ગાંધીધામ ST સ્ટેન્ડ પાછળ આવેલી એક ગટરની કુંડીમાં રાયફલ સહિતનો મુદ્દામાલ ભરેલી બેગ મળી આવી હતી. દિવસભરની તપાસ બાદ રાઈફલ મળતા આર્મી જવાન પોલીસ સહિત રેલવે અધિકારીઓએ રાહતનો દમ લીધો હતો.
આપને જણાવી દઇએ કે સયાજીનગરી એક્સપ્રેસમાં સવાર ભારતીય સેનાના એક જવાનની બેગ અને AK-47 રાયફલ ચોરાવાની ઘટના બનતા ગાંધીધામ રેલવે સ્ટેશનમાં અફરાતફરીનો માહોલ છવાઇ ગયો હતો. જો કે આ મામલે સ્થાનિક પોલીસ અને રેલવેના અધિકારીઓ તપાસ હાથ ધરી હતી. આ મામલે મોડી રાતે જવાનની બેગ અને રાયફલ મળી આવતા પોલીસે રાહતનો શ્વાસ લીધો હતો.