નવો મોબાઇલ લેવો હોય તો મોટાભાગના લોકોને મંઝવણ થાય છે કે કઇ કંપનીનું કયું મોડલ લેવું? કેમ કે દરેક પ્રાઇઝ સેગમેન્ટમાં ઢગલાબંધ વિકલ્પો મળે છે. ઉપરાંત દર મહિને-બે મહિને નવા નવા મોડલ લોન્ચ થતા હોય છે. મોબાઇલ અત્યારે એટલા ઝડપથી અપગ્રેડ થાય છે કે હજુ થોડા મહિના પહેલા મોબાઇલ ખરીદનારને પણ કોઇ નવું મોડલ આવે એટલે પોતાનો મોબાઇલ જુનો કે આઉટડેટેડ લાગે છે.
કાઉન્ટર પોઇન્ટ રિસર્ચના ઇન્ડિયા દ્રારા રસપ્રદ પ્રિમિયમ સ્માર્ટફોન કન્ઝયુમર સર્વે હાથ ધરાયો હતો. તેમાં જાણવા મળ્યું કે 20 હજાર કે તેથી મોંઘા મોબાઇલ ધરાવતા લોકો સરેરાશ એક વર્ષમાં નવો મોબાઇલ લેવાનું પ્લાનિંગ કરતા હોય છે. જોકે નવાઇની વાત એ છે કે સેમસંગ મોબાઇલ ધરાવતા લોકો એક વર્ષથી પણ ઓછા સમયમાં મોબાઇલ બદલે છે.
જયારે વન પ્લસનો મોબાઇલ ખરીદનારા લોકોમાં તેનું પ્રમાણ ઓછું છે. સેમસંગનો ફોન વાપરતા દર 10માંથી 6 યુઝર એક વર્ષમાં ફોન બદલવાનું વિચારતા હોય છે. જયારે વલ પ્લસનો ફોન વાપરતા દર દસમાંથી ચાર જ યુઝર તેમ વિચારે છે.
ભારતમાં પ્રિમિયમ મોબાઇલ સેગમેન્ટમાં સેમસન્ગ અને વન પ્લસ વચ્ચે જોરદાર હરિફાઇ છે. એપલ તેના વિવિધ મોડલના ઉંચા ભાવના કારણે ભારતના પ્રિમિયમ મોબાઇલ સેગમેન્ટમાં સ્થાન મેળવવા સંઘર્ષ કરી રહ્યું છે. બીજી બાજુ ઓપ્પો, વીવો, હુઆવે જેવી ચાઇનીઝ કંપનીઓ આ સેગમેન્ટમાં પોતાનો હિસ્સો વધારવા તમામ પ્રયાસો કરી રહી છે.
ભારતમાં જોકે હવે 40 હજાર કે તેથી વધુની કિંમતના મોબાઇલ ખરીદનારો વર્ગ પણ વધતો જાય છે. સર્વેમાં એવું પણ જાણવા મળ્યું કે ઇન ડિસ્પ્લે ફીંગરપ્રિન્ટ, બે કે તેથી વધુ કેમેરા, આર્ટીફિશિયલ ઇન્ટેલીજન્સ (એઆઇ) ફિચર્સ હોવા જ જોઇએ તેમ મોટાભાગના યુઝર્સ કહે છે.