બોરસદના NRI ગામ ભાદરણમાં નવી પહેલ રૂપે સાડી બેંક શરૂ કરવામાં આવી છે. જેમાં સામાજિક અને શુભપ્રસંગોમાં વિનામૂલ્યે સાડીઓ આપવામાં આવે છે.
NRI દાતા દ્વારા સર્વ પ્રથમ સાડી બેંક શરૂ કરાઈ
ગરીબ - મધ્યમ વર્ગની મહિલાઓ માટે આશીર્વાદરૂપ
સાડી બેંકમાં 300 મોંઘા ભાવની સાડીઓનું કલેકશન
લગ્નની સીઝન આવે એટલે ખરીદી પણ જોરશોરથી શરૂ થવાની. અને લોકો લગ્ન પ્રસંગ માટે નવા વસ્ત્રોની ખરીદી કરે. પરંતુ દરેક લોકોની આર્થિક સ્થિતિ એટલી મજબૂત નથી હોતી કે, તેઓ મોંઘી સાડીઓ ખરીદી શકે. અને તેમને પોતાની ઈચ્છા ન હોવા છતાં થોડા પૈસામાં રસ્તી વસ્તુઓ સાથે કામ ચલાવવું પડે છે. પરંતુ મહિલાઓની આવી જ ઈચ્છાઓને પૂર્ણ કરવા માટે આણંદની કેટલીક મહિલાઓએ એક પ્રયાસ શરૂ કર્યો છે. અને આવી મહિલાઓ માટે સાડી બેંક ખોલી છે.. જેમાં તમામ મોંઘી સાડીઓ વિનામૂલ્યે મળે છે. ત્યારે શું છે આ સાડીબેંક પાછળનો ઉદ્દેશ્ય
શુભપ્રસંગમાં શણગાર સજીને જવું તે દરેક મહિલાનો શોખ હોય છે. તેમાં પણ વસ્ત્રો એવા પહેરવા કે, વટ પડે. પરંતુ દરેક લોકોની આર્થિક સ્થિતિ એટલી સારી નથી હોતી કે, મોંઘા અને નવા વસ્ત્રો ખરીદીને પહેરી શકે. ત્યારે આવી જ મહિલાઓ માટે બોરસદના NRI ગામ ગણાતા ભાદરણમાં નવી પહેલ રૂપે સાડી બેંક શરૂ કરવામાં આવી છે. અને આ સાડી બેંકના નવીનતમ પ્રયોગ દ્વારા સામાજિક અને શુભપ્રસંગોમાં મહિલાઓને પહેરવા માટે વિનામૂલ્યે સાડીઓ આપવામાં આવે છે..
મહત્વનું છે કે, નવીનતંમ પ્રયોગ રૂપે સામાજિક શુભપ્રસંગોમાં ગરીબ અને મધ્યમવર્ગીય મહિલાઓના પ્રસંગ ખર્ચમાં ઘટાડો કરવાના ઉદ્દેશ્યથી આ સાડી બેંકની સ્થાપના કરવામાં આવી છે. જેના થકી મહિલાઓને શુભપ્રસંગોમાં વિનામૂલ્યે પોતાને મન ગમતી સાડી પરિધાન કરવાની મળશે. સામાન્ય સમજ મુજબ બેંક શબ્દ કાને પડતા જ આર્થિક વ્યવહારનું સ્થાન એમ જણાય. જ્યારે અહીં ગરીબ મધ્યમવર્ગની મહિલાઓ માટે ભાદરણના ગ્રામજનો અને NRI દાતા દ્વારા અનોખી સાડી બેંકની સ્થાપના દ્વારા સાડીની લેવડ દેવડ કરવામાં આવશે.
મહત્વનું છે કે, ભાદરણ ગામે ખુલ્લી મુકવામાં આવેલ સાડી બેંકમાં મોટાભાગની સાડીઓ ભેગી કરવાની મહેનત વિદેશની ધરતી પર કરવામાં આવી હતી. જેમાં ભાદરણના અને અમેરિકા સ્થાયી થયેલા અરવિંદભાઈ પટેલ, તેઓના ધર્મપત્ની હસુબેન તેમની દીકરી હીનાબેન વૈદ્ય બે પુત્રવધૂઓ પૂર્વીબેન અને નિમીષાબેન તેમજ ગામની ભાણી દિક્ષિતાબેન પટેલ દ્વારા સાડી બેંક માટે વિદેશની ધરતી પર મહિલાઓ પાસેથી સાડીઓ ભેગી કરવામાં આવી હતી.. આમ આ પહેલ દ્વારા 300 થી વધુ દરેક પ્રકારની મોંઘાભાવની સાડીઓનું કલેક્શન કરીને સાડી બેંક ઉભી કરવામાં આવી છે. અને આ બેંક ભાદરણ અને તેની આસપાસના ગામની ગરીબ અને મધ્યમવર્ગની બહેનો માટે એક વરદાન રુપ સાબિત થઈ રહી છે.. કારણ કે, પ્રસંગોમાં સારી અને મોંઘી સાડીઓ પણ પહેરવા મળે છે.. અને તે માટે કોઈપણ જાતનો ખર્ચો પણ નથી કરવો પડતો.