આરોપ / પેટાચૂંટણી : મતદાનના દિવસે જ કોંગ્રેસે EVM પર સવાલો ઉભા કરી દીધા, હેક થઇ જવાની આશંકા વ્યક્ત કરી

• મધ્ય પ્રદેશના પૂર્વ CMએ ફરી ઉઠાવ્યા EVM પર સવાલ 
• દિગ્વિજય સિંહને વોટિંગ મશીન હેક થઇ જવાની આશંકા 
• વિકસિત દેશો EVM પર ભરોસો કેમ નથી કરતા : દિગ્વિજય 

આજે મતદાન : 

ગુજરાત અને મધ્યપ્રદેશમાં આજે પેટાચૂંટણી યોજાઈ રહી છે એવામાં કોંગ્રેસે ફરીવાર EVM પર જ સવાલ ઉઠાવવાની શરૂઆત કરી દીધી છે. મધ્ય પ્રદેશમાં કોંગ્રેસના દિગ્ગજ નેતા અને પૂર્વ મુખ્યમંત્રી દિગ્વિજય સિંહે ફરીવાર મશીનો પર સવાલ ઉભા કર્યા છે. તેમણે કહ્યું કે ભારત અને અમુક નાના દેશો જ EVM મશીનનો ઉપયોગ કરે છે જ્યારે વિકસિત દેશો તેનો ઉપયોગ કરી રહ્યા નથી. 

કોંગ્રેસે ફરી ઉભા કર્યા સવાલ 

પેટાચૂંટણી યોજાઈ રહી છે ત્યાં દિગ્વિજય સિંહે ટ્વિટ કરીને કહ્યું કે ટેકનિકલ યુગમાં વિકસિત દેશો EVM ભરોસો નથી કરતા પણ ભારત અને અમુક દેશોમાં EVMથી ચૂંટણી યોજવામાં આવી રહી છે. વિકસિત દેશો કેમ નથી કરી રહ્યા ? કારણ કે તેમને EVM પર ભરોસો નથી. કેમ ? કારણ કે તેમાં ચીપ છે જે હેક થઇ શકે છે. 

પહેલા પણ વોટિંગ મશીનનો મુદ્દો ખૂબ વિવાદમાં રહ્યો 

નોંધનીય છે કે જ્યારે પણ દેશમાં ચૂંટણી યોજાય છે ત્યારે વિપક્ષી પાર્ટીઓ આ રીતે વોટિંગ મશીન પર સવાલ ઉભા કરતી રહે છે. આ પહેલા પણ લોકસભાની ચૂંટણીમાં પણ આ મુદ્દો ખૂબ ગાજ્યો હતો. પાર્ટીઓનો આરોપ છે કે ભાજપ આ મશીનને હેક કરાવી દે છે. 

જોકે મશીનો પર આવા આરોપો મોટા ભાગે પરિણામો આવ્યા બાદ ઉભા થતાં હોય છે પરંતુ કોંગ્રેસે આ વખતે તો ચૂંટણીમાં જ મશીન પર સવાલ ઉભા કરી દીધા છે. દિગ્વિજય સિંહના આ ટ્વિટ બાદ હવે વિવાદ વધે તો નવાઈ નહીં.