દીપિકા પાદુકોણ લાંબા સમય પછી ફિલ્મ 'છપાક'માં જોવા મળશે. ફિલ્મ 'છપાક'નું ટ્રેલર બધાંને ખૂબ જ પસંદ આવ્યું છે. ત્યારે, આ ફિલ્મના ટ્રેલર લોન્ચિંગ દરમિયાન તે ખૂબ જ ભાવુક જોવા મળી હતી. આ ફિલ્મ તેના માટે ખૂબ જ ખાસ હોવાનું જણાવ્યું હતું. તેણે આ ફિલ્મનું પ્રમોશન પણ શરૂ કરી દીધું છે. હાલમાં જ દીપિકા નેરોલેક ક્રિકેટ લાઈવ નામના શોમાં પહોંચી હતી. ત્યાં સ્પોર્ટ્સ અને સિનેમા અંગે તેણે કેટલીક બાબતો શેર કરી હતી. દીપિકાએ કહ્યું કે, શારીરિક સ્વાસ્થ્યની સાથે માનસિક રીતે સ્વસ્થ રહેવું પણ મહત્વપૂર્ણ છે.
હાલ દીપિકા પાદુકોણ ફિલ્મ 'છપાક'ના પ્રમોશનમાં વ્યસ્ત છે
એક ઈવેન્ટમાં દીપિકાએ જણાવ્યું ફેવરિટ ક્રિકેટર વિશે
દીપિકા અને રણવીર સાથે બેસીને મેચ જુએ છે
દીપિકાને પૂછવામાં આવ્યું, શું તે ક્રિકેટ જુએ છે? તેના જવાબમાં દીપિકાએ કહ્યું, હું અને રણવીર સાથે મળીને મેચ જોઈએ છીએ. તે ફૂટબોલનો ખૂબ જ મોટો ફેન છે અને તેને ક્રિકેટ પણ પસંદ છે. જોકે, અમે બધી મેચ જોતા નથી, પરંતુ અમે મહત્વપૂર્ણ મેચ એકસાથે બેસીને જોઈએ છે. ક્યારેક મિત્રો અને કુટુંબીઓ સાથે પણ મેચ જોઈએ છીએ. જે રીતે દેશમાં અન્ય પરિવારના લોકો જુએ છે.
સચિન કે ગાંગુલી નહીં બલ્કે આ ક્રિકેટર છે દીપિકાનો ફેવરિટ ખેલાડી
દીપિકાએ કહ્યું, મારો ઓલ ટાઈમ ફેવરિટ ક્રિકેટર રાહુલ દ્રવિડ છે. મારા ઘણાં આદર્શોને હું માત્ર તેમના પ્રોફેશનમાં કરેલાં અસાધારણ કામને લીધે પસંદ નથી કરતી પણ તેમણે જીવનમાં કેટલું સંઘર્ષ કર્યું અને પોતાને તૈયાર કર્યા, એ બાબતો મને વધુ પ્રભાવિત કરે છે. હું હમેશાંથી દ્રવિડને પસંદ કરું છું અને તે પણ બેંગલુરુથી છે.
ઉલ્લેખનીય છે કે, એક સમય એવો પણ હતો જ્યારે ઈન્ડિયન ટીમના ખેલાડી યુવરાજ સિંહને દીપિકા ડેટ કરી રહી હોવાની અફવાઓ પણ ઉડી હતી. વર્કફ્રંટની વાત કરીએ તો દીપિકા પણ ક્રિકેટથી જોડાયેલી ફિલ્મમાં કામ કરતી જોવા મળશે. તે ફિલ્મ 'છપાક' સહિત પતિ રણવીર સાથે ફિલ્મ '83'માં પણ જોવા મળશે. આ ફિલ્મમાં રણવીર કપિલ દેવની ભૂમિકામાં જોવા મળશે અને દીપિકા તેમની પત્નીના રોલમાં જોવા મળશે.