ચીનના હુબેઈ પ્રાંતની રાજધાની વુહાનથી ફેલાયેલો જીવલેણ કોરોના વાઈરસ હવે વિશ્વના 100 દેશોમાં હાહાકાર મચાવી રહ્યો છે. કોરોના વાઈરસના કારણે અત્યાર સુધીમાં 3,814 લોકોનાં મોત નીપજ્યાં છે, જ્યારે 10,9,122 આ ઘાતક વાઈરસથી સંક્રમિત છે.
ઈટાલીમાં એક જ દિવસમાં 133 લોકોનાં મોત, મૃત્યુઆંક 366 થયો
ચીનમાં કોરોનાથી અત્યાર સુધીમાં 3,097 લોકો મૃત્યુ પામ્યા છે
ચીનમાં કોરોના વાઈરસનો ચેપ 80,695 લોકોને લાગ્યો છે
કોરોના વાઈરસ અટકવાનું નામ નથી લઈ રહ્યો. હજુ પણ કોરોનાથી સૌથી પ્રભાવિત લોકો ચીનના જ છે. આ વાઈરસ વિશે તૈયાર કરાયેલા એક અહેવાલ મુજબ ચીનમાં થયેલાં 80 ટકા મૃત્યુના કિસ્સામાં 60 વર્ષથી વધુ ઉંમરના લોકો ભોગ બન્યા છે.
હાલમાં કોરોના વાઈરસથી ચેપગ્રસ્ત લોકોની સંખ્યા સત્તાવાર જારી થયેલા આંકડા કરતાં ઘણી વધારે હોવાની આશંકા છે અને ચીનમાં કોરોનાથી અત્યાર સુધીમાં 3,097 લોકો મૃત્યુ પામ્યા છે, જ્યારે આ વાઈરસનો ચેપ 80,695 લોકોને લાગ્યો છે.
ચીન બાદ આ જીવલેણ વાઈરસ ઈટાલીમાં સૌથી વધુ ખતરનાક બન્યો છે. ઈટાલીમાં કોરોનાના કારણે અત્યાર સુધીમાં 366 લોકોનાં મોત નીપજ્યાં છે જ્યારે 7000થી વધુ લોકોને તેનો ચેપ લાગ્યો છે. કોરોના વાઈરસે અખાતી દેશ ઈરાનમાં પણ મોટી પાયમાલી સર્જી છે. ઈરાનમાં આ વાઈરસના કારણે 194 લોકોનાં મોત નીપજ્યાં છે, જ્યારે 6,566 લોકો આ વાઇરસથી સંક્રમિત છે.
ઈટાલીએ ગઈકાલે રવિવારે કોરોના વાઈરસના કારણે થયેલા મૃત્યુની બાબતમાં વિશ્વમાં બીજું સ્થાન નોંધાવ્યું છે. ચીનમાં સૌથી વધુ મોત થયા છે. ઈટાલી બાદ દક્ષિણ કોરિયામાં કોરોનાનો સૌથી વધુ કેર જોવા મળ્યો છે, જ્યાં નવા કેસ ભયંકર ઝડપથી વધી રહ્યા છે. ઈટાલીની નાગરિક સુરક્ષા એજન્સીના જણાવ્યા અનુસાર મોટા ભાગના મોત હાર્ડ બોન લોમ્બાર્ડી વિસ્તારમાં થયા છે, જ્યાં કેસની સંખ્યા લગભગ ત્રણ ગણી વધી છે.
રવિવારે એક જ દિવસમાં કોરોનાના કારણે મૃત્યુ પામનારા લોકોની સંખ્યા 133થી વધીને 366 થઈ ગઈ છે. ઈટાલીમાં ચીનની બહાર અત્યાર સુધીમાં સૌથી વધુ મોત નોંધાયા છે. એક જ દિવસમાં કોરોના વાઈરસથી સંક્રમિત દર્દીઓની સંખ્યા 1,492થી વધીને 7,392 થઈ ગઈ છે. બીજી તરફ દક્ષિણ કોરિયામાં હાલમાં 7,313 કેસ નોંધાયા છે. ઈટાલીની સિવિલ પ્રોટેક્શન એજન્સીના વડા એન્જેલો બોરેલીએ જણાવ્યું હતું કે, કોરોના વાઈરસના પ્રકોપને રોકવા માટે 2.2 કરોડ સર્જિકલ માસ્કનો ઓર્ડર આપવામાં આવ્યો છે.
ખતરનાક કોરોના વાઈરસના કારણે અમેરિકામાં અત્યાર સુધીમાં 21 લોકોનાં મોત નીપજ્યાં છે. કેલિફોર્નિયાના ગવર્નર ગેવિન ન્યુસમે એક પ્રેસ કોન્ફરન્સમાં જણાવ્યું હતું કે ગ્રાન્ડ પ્રિન્સેસ ક્રૂઝ શિપમાં ઓછામાં ઓછા 21 લોકોને કોરોનાનો ચેપ લાગ્યો હોવાની પુષ્ટિ થઈ છે. આ શિપ આજે ઓકલેન્ડ પહોંચવાનું છે. અમેરિકામાં 550 લોકોના કોરોના વાઈરસ અંગેના ટેસ્ટ પોઝિટિવ આવ્યા હતા.