હકીકત / દલિત યુવક સાથેની મારપીટની સચ્ચાઈ આવી સામે, રાજસ્થાનમાં દબંગોએ યુવકને ધોઈ નાખ્યો

• રાજસ્થાનમાંથી સામે આવ્યો વીડિયો
• દુકાનદાર સાથે બરાબરની મારપીટ કરી
• દુકાને આવતી છોકરીઓની કરતો છેડતી

રાજસ્થાનના જાલોર જિલ્લામાંથી એક દલિત યુવક સાથે ઢોર માર મારવાનો કિસ્સો સામે આવ્યો છે. સોશિયલ મીડિયા પર વાયરલ વીડિયોમાં ચાર યુવક એક અન્ય યુવકને ઢોરમાર મારતા દેખાઈ રહ્યા છે. આરોપીઓને ડર છે કે, પીડિતે પોલીસમાં ફરિયાદ પણ નોંધાવી નહોતી. ઘટના બુધવારની છે, પણ સોશિયલ મીડિયા પર વીડિયો હવે વાયરલ થઈ રહ્યો છે, જે બાદ પોલીસ એક્શનમાં આવી છે અને પહેલા પીડિતને શોધ્યો અને બાદમાં આ કેસમાં સંડોવાયેલ 4 લોકોની ધરપકડ કરી હતી.

મોબાઈલની દુકાન પર છોકરીઓ સાથે વાતચીતને લઈને નારાજગી

પોલીસે જણાવ્યું હતું કે, પીડિત પુરારામ મેઘવાળ હાડેચા વિસ્તારમાં આવેલા મોબાઈલ રિપેરિંગની દુકાન ચલાવે છે. આરોપીઓએ પોલીસને જણાવ્યું હતું કે, પુરારામ પોતાની દુકાન પર આવતી છોકરીઓ સાથે લાંબી લાંબી વાતો કરતો હતો. કેટલાય વાર તેને સમજાવ્યો, પણ તે માનતો નહોતો. પોલીસના જણાવ્યા અનુસાર તેનાથી નારાજ થઈને આરોપીઓએ તેને ધોઈ નાખ્યો હતો.

આરોપીઓ પાસે માગી લિફ્ટ

પોલીસે જણાવ્યું હતું કે, આ ઘટનાવાળા દિવસે પીડિતે આરોપીઓ પાસેથી જ તેના ગામથી દુકાન જવા માટે લિફ્ટ માગી હતી. જે બાદ આરોપીઓએ તેને પોતાની સ્કોર્પિયોમાં બેસાડ્યો હતો. આ દરમિયાન રસ્તામા આરોપી અર્જૂનકુમાર અને પીડિત વચ્ચે બોલાચાલી થઈ હતી. ત્યાર બાદ અર્જૂન સહિત અન્ય ચારે ગાડીમાંથી ઉતરીને પુરારામને બરાબરનો મેથીપાક આપ્યો હતો. 

આરોપીઓએ જ બનાવ્યો વીડિયો

પોલીસના જણાવ્યા અનુસાર પુરારામની સાથે મારપીટનો વીડિયો પણ આરોપીઓએ જ બનાવ્યો હતો, બાદમાં વીડિયો સોશિયલ મીડિયા પર વાયરલ કર્યો હતો. ઢોર માર માર્યા બાદ ડરના કારણે પીડિત યુવક બે દિવસ સુધી પોલીસ પાસે પણ જઈ શક્યો નહીં. ઘટનાનો વીડિયો સોશિયલ મીડિયા પર વાયરલ થયા બાદ તેણે પોલીસમાં ફરિયાદ નોંધાવી.