ગુજરાતના લગભગ જિલ્લાઓમાંથી બોગસ ડૉક્ટરો ઝડપાઈ રહ્યા છે ત્યારે કોંગ્રેસના મહિલા ધારાસભ્ય ગેનીબેન ઠાકોરે આવા નકલી તબીબો વિરુદ્વ થતી કાર્યવાહી બંધ કરવાની રજૂઆત કરાઈ
બનાસકાંઠાના વધુ એક MLA બોગસ તબીબોની વ્હારે આવ્યા છે. કોંગ્રેસ MLA ગેનીબેન ઠાકોરે DyCM નીતિન પટેલને પત્ર લખ્યો છે. અને એક વિચિત્ર માગણી કરી છે. બોગસ ડોક્ટર વિરુદ્વ થતી કાર્યવાહી બંધ કરવાની રજૂઆત એક મહિલા MLAએ કરી છે. કોંગ્રેસમાં MLA ગેનીબેન ઠાકોરનું ખુબ મોટું વર્ચસ્વ છે. અને એક MLA આ પ્રકારની રજૂઆત કરે તે માનવામાં આવતું નથી. ગેનીબેન ઠાકોરે ત્યાં સુધી પોતાના પત્રમાં લખ્યું કે, બોગસ તબીબ સામે થતી કાર્યવાહીથી લોકોમાં રોષ છે. અને કોરોનાકાળમાં આ નકલી તબીબોએ જ લોકોના જીવ બચાવ્યાનો દાવો પણ કર્યો છે.
સાથે સરકારની આરોગ્ય સુવિધાને લઈને પણ અનેક સવાલો કર્યા છે. ગેની ઠાકોરે પોતાના પત્રમાં સરકારી દવાખાનામાં પૂરતી અવ્યવસ્થા વિરુદ્ધ સવાલો ઉઠાવ્યા છે. અને કહ્યું કે, સરકારે આ પ્રકારના નકલી તબીબો પર કાર્યવાહી કરવાના બદલે પુરતા પ્રમાણમાં MBBS તબીબોને નિમણૂક કરવી જોઈએ.
MLA ગેનીબેન ઠાકોર દ્વારા આ પ્રકારની માગણી કેટલી યોગ્ય ગણવામાં આવવી જોઈએ. કારણ કે, તેમનો દાવા પ્રમાણે આ નકલી તબીબોએ લોકોનો જીવ બચાવ્યો છે. પરંતુ હકિકતમાં અનેક લોકોએ આ ઝોલાછાપ તબીબોના કારણે પોતાનો જીવ પણ ગુમાવ્યો છે. સરકારની વ્યવસ્થા પર સવાલ ઉઠાવો તેમના અધિકારમાં છે. પણ કોઈ ખોટા કામને મહામારીની આડમાં સાચું દર્શાવવું તે યોગ્ય નથી.
બનાસકાંઠા લાખણીના પૂર્વ પંચાયત પ્રમુખે પણ આવી જ માગણી કરી હતી
તો આ અગાઉ બનાસકાંઠામાં બોગસ ડૉક્ટરના સમર્થનમાં તાલુકા પંચાયતના પૂર્વ પ્રમુખ પણ આવ્યા હતા. લાખણી તાલુકા પંચાયતના પૂર્વ પ્રમુખે CM રૂપાણીને પત્ર લખ્યો હતો. બોગસ ડોક્ટર સામે કાર્યવાહી ન કરવાનો પત્ર લખ્યો હતો. અને કહ્યું કે, બોગસ ડોક્ટરો નહીં પણ ડૉક્ટરો સહાયક તબીબ કહેવાય તેવી વાત લાખણી તાલુકા પંચાયતના પૂર્વ પ્રમુખ મહેશ દવેએ કરી હતી. સાથે બોગસ ડોક્ટર સામે કાર્યવાહી ન કરવા પુર્વ પ્રમુખ મહેશ દવેએ પત્ર ઉલ્લેખ કર્યો હતો. કોરોનાની મહામારીમા આવા સહાયક ડોકટરોએ જનતાની સેવા કરી હોવાના ગુણગાન પણ ગાયા હતા.