- સૌરાષ્ટ્ર યુનિવર્સિટી એજ્યુકેશન ભવનની ભરતીનો વિવાદ
- નિદત બારોટની સી.આર પાટીલ સાથેની બેઠકથી તર્કવિતર્ક
- વિકેન્ડ હાઉસમાં બન્ને સાથે જોવા મળતા રાજકારણ ગરમાયું
Rajkot News: સૌરાષ્ટ્ર યુનિવર્સિટીના એજ્યુકેશન ભવનની ભરતીનો વિવાદ પ્રદેશ ભાજપ સુધી પહોંચ્યો છે. યુનિવર્સિટીના સેનેટ સભ્ય અને કોંગ્રેસ નેતા ડૉ.નિદત બારોટ ભાજપના પ્રદેશ અધ્યક્ષ સી.આર પાટીલ સાથે જોવા મળતા અનેક તર્ક વિતર્ક સર્જાયા છે. એરપોર્ટ રોડ પર આવેલા વિકેન્ડ હાઉસમાં કોંગ્રેસ નેતા ડૉ.નિદત બારોટ અને ભાજપના પ્રદેશ અધ્યક્ષ સી.આર પાટીલ સાથે જોવા મળતા રાજકારણ ગરમાયું છે. સૌરાષ્ટ્ર યુનિવર્સિટીમાં નિદત બારોટના બહેન શ્રદ્ધા બારોટની નિમણૂક અટકતા તેઓએ સી.આર પાટીલ સાથે મુલાકાત કરી હોવાની ચર્ચા ચારેકોર ચાલી રહી છે.
વિકેન્ડ હાઉસમાં બંને વચ્ચે થઈ ખાનગી બેઠક
કોંગ્રેસ નેતા ડૉ.નિદત બારોટ અને ભાજપના પ્રદેશ અધ્યક્ષ સી.આર પાટીલનો વીડિયો સોશિયલ મીડિયામાં વાયરલ થતાં અનેક તર્ક વિતર્ક સર્જાયા છે. રાજકોટના એરપોર્ટ રોડ પર આવેલા વિકેન્ડ હાઉસમાં બંને વચ્ચેની ખાનગી બેઠકથી રાજકારણમાં ગરમાવો આવ્યો છે. જોકે, હજુ સુધી નિદત બારોટનું આ મામલે કોઈ સત્તાવાર નિવેદન સામે આવ્યું નથી.
શું છે સમગ્ર મામલો?
2019માં જાહેર કરવામાં આવેલી ભરતી 2023માં કરાતા વિવાદ શરૂ થયો છે. સૌરાષ્ટ્ર યુનિવર્સિટીના મેથેમેટિક્સ, એજ્યુકેશન અને હિન્દી ભવનમાં ભરતી બહાર પાડવામાં આવી હતી, જેમાં લાગતા વળગતાની ભરતી કરી દેવામાં આવી હોવાના આક્ષેપો થતાં ખળભળાટ મચી ગયો હતો.
ઇન્ટરવ્યુમાં માત્ર એક-એક જ ઉમેદવારોને બોલાવવામાં આવ્યા
મેથેમેટિક્સ, એજ્યુકેશન અને હિન્દી ભવનમાં ઇન્ટરવ્યુ ગોઠવવામાં આવ્યા હતા. યુનિવર્સિટી દ્વારા મેથેમેટિક્સ, એજ્યુકેશન અને હિન્દી ભવનના ઇન્ટરવ્યુમાં માત્ર એક-એક જ ઉમેદવારોને બોલાવવામાં આવ્યા હતા.
શ્રદ્ધા બારોટની કરાઈ હતી પસંદગી
જેમાં એજ્યુકેશન ડિપાર્ટમેન્ટમાં કોંગ્રેસ નેતા નિદત બારોટના બહેન શ્રદ્ધા બારોટનું ઈન્ટરવ્યુ લઈ પસંદગી કરવામાં આવી હતી. જોકે, શ્રદ્ધા બારોટ અનુભવમાં ગેર લાયક છે તેવું એજ્યુકેશન ડિપાર્ટમેન્ટના હેડ ભરત રામનુજે લેખિતમાં આપ્યું હતું. તો લખનઉની ડૉ. બાબા સાહેબ ભીમરાવ આંબેડકર યુનિવર્સિટીના એજ્યુકેશન ફેંકલ્ટીના હેડ ડૉ. હરીશંકર સિંઘે સવાલો ઉઠાવ્યા હતા. જે બાદ નિદત બારોટની બહેનની નિમણૂક અટકી હતી.
