રાજનીતિ / ભાજપ-કોંગ્રેસ વચ્ચે 'બસ પોલિટિક્સ', રાજસ્થાને યુપી સરકારને મોકલ્યું બિલ

• ભાજપ અને કોંગ્રેસ વચ્ચે બસ પોલિટિક્સ બીજા તબક્કામાં
• રાજસ્થાન સરકારે UP સરકારને મોકલ્યું 36 લાખનું બિલ 
• ગેહલોત સરકારે કોટાથી વિદ્યાર્થીઓને UP મોકલ્યા હતા 

ઉત્તરપ્રદેશમાં ભાજપ અને કોંગ્રેસ વચ્ચે ચાલી રહેલી બસ પોલિટિક્સ બીજા તબક્કામાં પહોંચી ગઈ છે. યુપી સરકારને 1 હજાર બસ આપવાના કોંગ્રેસ મહાસચિવ પ્રિયંકા ગાંધીના પ્રસ્તાવ પર હજુ રાજનીતિ ઠંડી નથી થઈ ત્યારે હવે રાજસ્થાનની કોંગ્રેસ સરકારે યુપીની યોગી સરકારને 36 લાખ 36 હજારનું બિલ મોકલ્યું છે.

રાજસ્થાનના કોટાથી ઉત્તરપ્રદેશના વિદ્યાર્થીઓને પરત મોકલવા માટે રાજસ્થાન સરકારે 70 બસ ઉપલબ્ધ કરાવી હતી. જે મામલે હવે બિલ મોકલ્યું છે. આ સાથે યોગી સરકારને તાત્કાલિક બિલ ચૂકવવા માટે કહેવામાં આવ્યું છે.

તમને જણાવી દઈએ કે રાજસ્થાનમાં 12 હજાર જેટલા વિદ્યાર્થી ફસાયા હતા. યુપી સરકારે 560 બસ વિદ્યાર્થીઓને તેમના ઘર સુધી પહોંચાડવા માટે મોકલી હતી. જોકે વિદ્યાર્થી વધુ હોવાથી બસ ખુટી હતી. આ દરમિયાન રાજસ્થાન સરકારે 70 બસ ઉપલબ્ધ કરાવી હતી. જેનું હવે 36 લાખ જેટલું બિલ માગી રહી છે.