અવનવું / ચીનમાં 2020માં શરૂ થશે વિશ્વનો સૌથી લાંબો કેબલ બ્રિજ : જાણો રસપ્રદ વિગતો

વિશ્વનો સૌથી લાંબો કેબલ બ્રિજ શરૂ કરશે ચીન 

આ કારણે જ છેલ્લા થોડા સમયથી એશિયામાં સૌથી લાંબો પુલ બનાવવાની હરિફાઈ ચાલી રહી છે. ખાસ કરીને ભારત અને ચીન વચ્ચે સૌથી લાંબા પુલનું નિર્માણ કરવાની વાતમાં હોડ ચાલે છે. ગત વર્ષે જ ભારતે એશિયાના સૌથી મોટા બ્રિજનું લોકાર્પણ કર્યું હતું. હવે ચીન પણ બહુ જલ્દી વિશ્વનો સૌથી લાંબો પુલ શરૂ કરવા જઈ રહ્યું છે.

ચીન દ્વારા બનાવવામાં આવી રહેલા આ પુલની વિશેષતા એ છે કે, તેમાં નદીના કાંઠે ફક્ત બે સ્તંભ જ હશે. નદી ઉપરનો આખો પુલ કેબલ પર આધારિત હશે. આ પુલ ફ્લૉટિંગ સિસ્ટમની ટેક્નોલૉજી પર બનાવવામાં આવી રહ્યો છે. 

ભૂકંપ અને તોફાન જેવી વિકટ પરિસ્થિતિમાં રહેશે મજબૂત

સાદી ભાષામાં કહે તો આ પુલ હવામાં ઝૂલતો રહેશે. જોકે, પુલ પરથી અવરજવર કરનારા મુલાકાતીઓને આ વાતનો આભાસ પણ નહીં થાય. ફ્લૉટિંગ સિસ્ટમને કારણે આ પુલ ભૂકંપ અને તોફાન જેવી વિકટ પરિસ્થિતિમાં પણ મજબૂતીથી ટકી રહેશે.

અહેવાલો અનુસાર, ચીનમાં વિશ્વનો સૌથી લાંબો કેબલ બ્રિજ કિંગશાન યાંગ્ત્ઝી નદી પર બનાવવામાં આવી રહ્યો છે. તેનું નિર્માણ ચીનની રેલ્વે મેજર બ્રિજ એન્જિનિયરિંગ ગ્રૂપ કંપની દ્વારા કરવામાં આવી રહ્યું છે. ઉલ્લેખનીય છે કે, ચીનની કિંગશાન યાંગત્ઝી નદી વિશ્વની ત્રીજી સૌથી લાંબી નદી પણ છે. તેની ઉપર બની રહેલા વિશ્વના સૌથી લાંબા કેબલ બ્રિજનું કાઉન્ટ ડાઉન શરૂ થઈ ગયું છે.

2020માં પુલની થશે શરૂઆત 

સૂત્રોના જણાવ્યા પ્રમાણે, વર્ષ 2020ની શરૂઆતમાં આ પુલ શરૂ કરી દેવામાં આવશે. બ્રિજનું નિર્માણકાર્ય લગભગ પૂર્ણ થઈ ગયું છે અને હાલમાં તેને અંતિમ સ્વરૂપ આપવામાં આવી રહ્યું છે. ચીનમાં બની રહેલા વિશ્વના સૌથી લાંબા કેબલ બ્રિજની કુલ લંબાઈ 7,548 મીટર છે અને તેની પહોળાઈ 48 મીટર છે. એવો દાવો કરવામાં આવી રહ્યો છે કે, આ પુલ વિશ્વનો સૌથી લાંબો કેબલ બ્રિજ જ નહીં, પણ વિશ્વનો સૌથી પહોળો કેબલ બ્રિજ પણ છે.

આ પુલ સેન્ટ્રલ ચીનના હુબેઈ પ્રાંતની રાજધાની વુહાનમાં કિંગશાન યાંગત્ઝી નદી પર બનાવવામાં આવી રહ્યો છે. હાલ આ પુલ ઉપર ડામર પાથરીને તેનું નિર્માણ શરૂ કરાયું છે. ચીનની રેલ્વે મેજર બ્રિજ એન્જિનિયરિંગ ગ્રૂપ કંપનીના અધિકારીઓના જણાવ્યા મુજબ, નિર્માણકાર્ય પૂર્ણ થયા બાદ આ વિશ્વનો સૌથી લાંબો કેબલ બ્રિજ બનશે.

આવી છે વિશેષતા 

આ પુલ બંને બાજુએથી કુલ 10 લેનનો છે. આ પુલ બનાવવા માટે નદીની બંને તરફ બે ઊંચા ટાવર બનાવવામાં આવ્યા છે. આ બે ટાવરના સહારે આ બ્રિજ કેબલ દ્વારા બનાવવામાં આવ્યો છે. સૌથી રસપ્રદ વાત એ છે કે, નદી ઉપર પુલના ઝૂલતા ભાગમાં લૉઅર બીમ પણ નથી. 

લૉઅર બીમની જગ્યાએ બ્રિજના રોડને ટેકો આપવા માટે સ્ટીલ સ્ટ્રક્ચર્સનો ઉપયોગ કરવામાં આવ્યો છે. તેને કારણે પુલ ભારે પવન અને ધરતીકંપ વખતે નદીના કિનારે બાંધવામાં આવેલા બે ટાવરની વચ્ચે ઝૂલી શકે છે.