ગુજરાતમાં સાબરમતી રિવરફ્રન્ટ ખાતે રાજ્યકક્ષાની જ્યારે મોઢેરા સૂર્ય મંદિર ખાતે જિલ્લા કક્ષાના યોગ દિનની હર્ષોલ્લાસ ભેર ઉજવણી, યોગમય બન્યુ ગુજરાત
રાજ્યમાં વિશ્વ યોગ દિનની ઉજવણી
વરસાદ વચ્ચે પણ યોગ દિવસ ઉજવાયો
મોઢેરા ખાતે જિલ્લાકક્ષાના યોગદિનની ઉજવણી
21 જૂન એટલે આંતરરાષ્ટ્રીય યોગ દિવસ. ત્યારે રાજ્યભરમાં ઉત્સાહ ભેર યોગ દિવસની ઉજવણી કરવામાં આવી રહી છે. વહેલી સવારથી જ વિવિધ જાહેર સ્થળો ખાતે અનોખા અંદાજમાં યોગ દિવસની ઉજવણી કરવામાં આવી. ત્યારે અમદાવાદ સાબરમતી રિવરફ્રન્ટ ખાતે વિશ્વ યોગ દિવસ નિમિત્તે રાજ્યકક્ષાનો કાર્યક્રમ યોજાયો. જેમાં ખાસ ઉપસ્થિત સીએમ ભૂપેન્દ્ર પટેલે યોગ કર્યા. આ પ્રસંગે મોટી સંખ્યામાં લોકો યોગ કરવા પહોંચ્યા હતા.
સૂર્યમંદિર ખાતે રાજ્યકક્ષાના યોગ દિનની ઉજવણી
મહેસાણામાં મોઢેરા સૂર્ય મંદિર ખાતે જિલ્લા કક્ષાના યોગ દિવસની ઉજવણી કરવામાં આવી. આરોગ્ય મંત્રી ઋષિકેશ પટેલ, કેન્દ્રિય મંત્રી પરસોતમ રૂપાલાની ઉપસ્થિતિમાં યોગ દિવસની ઉજવણી કરવામાં આવી હતી. આ કાર્યક્રમ કંઇક અલગ હતો કારણ કે પેહલી વાર ખેડૂતો યોગાભ્યાસમાં જોડાયા હતા. લગભગ 2 હજાર 400 જેટલા ખેડૂતો યોગાભ્યાસમાં જોડાયા. આ ઉપરાંત પણ અન્ય લોકો થઇને કુલ 5 હજાર જેટલા લોકોએ સામૂહિક યોગ કરીને વિશ્વ યોગ દિવસને યાદગાર બનાવી દીધો હતો. જો કે મેટ લેવા માટે લોકોએ પડાપડી કરતા થોડી અવ્યવસ્થા સર્જાઇ હતી.
SOU ખાતે યોગાભ્યાસ
તો આ તરફ કેવડિયા ખાતે સ્ટેચ્યુ ઑફ યુનિટીમાં યોગ દિવસની ઉજવણી કરવામાં આવી હતી. કેન્દ્રિય મંત્રી મનસુખ માંડવિયાની અધ્યક્ષતામાં આ કાર્યક્રમ યોજવામાં આવ્યો હતો. જેમાં મંત્રીઓ સાથે સાથે કલાકારો પણ કાર્યક્રમમાં ઉપસ્થિત રહ્યા હતા. આ કાર્યક્રમમાં આશરે 3 હજાર લોકો જોડાયા હતા. સ્ટેચ્યુ ઑફ યુનિટી ખાતે વહેલી સવારે એક અલગ જ માહોલ જોવા મળ્યો હતો.
વરસાદ વચ્ચે પણ હર્ષોલ્લાસભેર યોગા
સુરતમાં પણ વિશ્વ યોગ દિવસની ઉજવણી કરવામાં આવી. અહીં મનપા દ્વારા એરપોર્ટ રોડ પર યોગ દિવસ માટેના વિશેષ કાર્યક્રમનું આયોજન કરવામાં આવ્યું હતું. જો કે વરસાદનું વિઘ્ન નડ્યુ પરંતુ તેમ છતાં પણ હર્ષોલ્લાસ ભેર વરસાદ વચ્ચે પણ યોગા દિવસની ઉજવણી કરવામાં આવી. મેયર, સાંસદ સહિતના લોકોએ વરસાદમાં યોગા કર્યા સાથે 3 હજાર લોકો પણ જોડાયા. આ ઉપરાંત શહેરમાં અન્ય 49 સ્થળો પર યોગ દિવસની ઉજવણી કરવામાં આવી હતી.
અદાણી શાંતિગ્રામ ખાતે યોગાભ્યાસ
તો આ તરફ અમદાવાદમાં આંતરરાષ્ટ્રીય યોગ દિવસની ઉજવણી કરવામાં આવી હતી. અદાણી શાંતિગ્રામમાં સામૂહિક યોગાભ્યાસ કરવામાં આવ્યો હતો. જેમાં મંત્રી જગદીશ વિશ્વકર્મા, કલેકટર ખાસ ઉપસ્થિતિ રહ્યા હતા. આ પ્રસંગે મોટી સંખ્યામાં લોકો આ કાર્યક્રમમાં જોડાયા હતા. જે દર્શાવે છે કે યોગ પ્રત્યે જનતા ખરેખર સજાગ થઇ છે અને રસ લેતી થઇ છે.
પૂર્વ સીએમ રૂપાણીએ કર્યા યોગા
રાજકોટમાં પણ RKC ગ્રાઉન્ડ ખાતે વિશ્વ યોગ દિવસની ઉજવણી કરવામાં આવી. રાજકીય અગ્રણીઓ અને અધિકારીઓએ આ કાર્યક્રમમાં ઉપસ્થિત રહ્યા હતા. પૂર્વ CM રૂપાણી, સાંસદ રામ મોકરિયા, કલેક્ટરે યોગાસન કર્યા હતા. VVIP સાથે અન્ય લોકો પણ યોગ દિવસના કાર્યક્રમમાં જોડાયા હતા.
પ્રકૃતિ-પરમાત્માના સાંનિધ્યમાં યોગ
તો આ તરફ ગિરનારની ગોદમાં પણ યોગ દિવસ ઉજવાયો. જૂનાગઢમાં વિશ્વ યોગ દિવસની ઉજવણી કરવામાં આવી. દામોદાર કુંડ ખાતે જૂનાગઢ કોર્પોરેશન દ્વારા કાર્યક્રમનું આયોજન કરવામાં આવ્યું હતું. જેમાં મોટી સંખ્યામાં લોકોએ ઉત્સાહભેર ભાગ લીધો હતો. પ્રકૃતિ અને પરમાત્માના સાંનિધ્યમાં યોગ દિનની ઉજવણી કરવામાં આવી.