ભાજપના પ્રદેશ પ્રમુખ સી. આર. પાટીલ તેમની આક્રમકતાના કારણે લોકોમાં જાણીતા બન્યા છે. જોકે સ્થાનિક સ્વરાજ્યની ચૂંટણીમાં પાટીલ ભાઉની યંગ ઉમેદવારોની ટીમ ફક્ત કાગળ પરનો વાઘ પુરવાર થઈ.
ચૂંટણીને લઇને રાજકીય પક્ષોમાં ધમધમાટ
ભાજપનો નવો નિયમ, 60થી વધુ ઉંમરના ઉમેદવારોને ટિકિટ નહી
ભાજપના 20થી વધુ દાવેદારોને ઘરે બેસાડી દેવાયા
વિધાનસભાની આઠ બેઠકની પેટાચૂંટણીનો સંગ્રામ હોય કે સંગઠનનું નવું માળખું તૈયાર કરવાનું હોય કે પછી સ્થાનિક રાજ્યની ચૂંટણીમાં ઉમેદવારની પસંદગી માટેના માપદંડ હોય, પરંતુ પાટીલ ભાઉ સતત ચર્ચાસ્પદ બન્યા છે. અમદાવાદ મ્યુનિ. કોર્પોરેશનની સામાન્ય ચૂંટણીની વાત કરીએ તો તેમણે 'ઘરડાં ગાડાં વાળે' તેવી નીતિને કચરાની ટોપલીમાં ફેંકી દઈને લોકોને નવી દિશા, નવું નેતૃત્વ અને નવું લોહી પૂરું પાડવાની જાહેરાત કરતાં અનેક યુવા દાવેદારોમાં ઉત્સાહનું મોજું ફરી વળ્યું હતું. ભાજપ હાઈકમાન્ડ હવે ઉમેદવારોની યાદીમાં યુવાનોને પ્રાધાન્ય આપશે તેવી ચર્ચાએ રાજકીય વર્તુળોમાં વેગ પકડ્યો હતો, પરંતુ શહેરના ઉમેદવારોની યાદીને જોતાં પાટીલ ભાઉનાં સપનાં, સપનાં જ રહીને વાસ્તવિકતામાં બદલાયાં નથી તે બાબત પહેલી નજરમાં સ્પષ્ટ થઈ છે એટલે ઉમેદવારોની કહેવાતી યંગ ટીમ માત્ર અને માત્ર કાગળ પરનો વાઘ પુરવાર થઈ છે.
જોકે ટિકિટ મેળવવાના માપદંડમાં હાઈકમાન્ડે ચિત્ર-વિચિત્ર શરત મૂકીને દાવેદારોને ચોંકાવી દીધી હતા. તેમાં િહન્દુવાદી એજન્ડાને વરેલા પક્ષમાં રામજન્મભૂમિને દાન આપવાની શરત પણ હતી. ઉપરાંત પેજ સમિતિ બનાવનારા, સરકારી યોજનાનો પ્રચાર કરનારાને પસંદ કરાશે તેવો માપદંડ પણ હતો. જોકે યુવાઓને પ્રાધાન્ય આપવા ૫૫ વર્ષથી વધુ વયનાને ટિકિટ નહીં અપાય તેવા નિયમની જાહેરાત કરતા રાજકીય વર્તુળો પણ અચંબામાં મુકાયા હતા.
પ્રદેશ પ્રમુખ સી. આર. પાટીલે જાહેર કરેલી ઉમેદવારોની યાદીમાં ૫૫ના બદલે ૬૦ વર્ષની વયમર્યાદા રખાઈ અને ૬૦થી વધુ ઉંમરના ૨૦થી વધુ દાવેદારોને ઘેર બેસાડી દેવાયા હતા. જેના કારણે મ્યુનિ. ભાજપના અનેક રથિ-મહારથિ કપાયા હતા, પરંતુ ભાજપની સત્તાવાર યાદીમાં યુવા ઉમેદવારો પ્રમાણમાં ખૂબ ઓછા છે.
૨૦થી ૩૦ વર્ષના ફક્ત ૧૧ ઉમેદવાર એટલે કે માંડ ૫.૭ ટકા યુવા ઉમેદવાર હોઈ પ્રદેશ પ્રમુખ સી. આર. પાટીલની ઇચ્છા મુજબનું નવું લોહીનું નવું નેતૃત્વ જો ભાજપ ચૂંટણી જીતે તો મતદારોને મળવાનું નથી. જ્યારે ૩૧થી ૪૦ વર્ષના ૨૮ ઉમેદવાર છે તો ૪૧થી ૫૦ વર્ષના ૭૮ ઉમેદવાર છે.
ભાજપની યાદીમાં આશ્ચર્યજનક રીતે ૫૧થી ૫૯ વર્ષના એટલે કે ૫૦ વર્ષથી ઉપરના અને ૬૦ વર્ષની નજીક પહોંચેલા ૭૫ ઉમેદવાર છે. આ બાબત ભાજપના ઉમેદવારો પૂરેપૂરા 'યુવા' નથી તે પુરવાર કરે છે.
પ્રદેશ હાઈકમાન્ડના નવા માપદંડ મુજબ આશરે ૫૧થી ૫૯ વર્ષના ૪૦ ટકા ઉમેદવાર ઉંમરની દૃષ્ટિએ 'અડધા ઘરડા' છે. હવે જો આવા ઉમેદવાર ચૂંટણી જંગમાં જીતીને આવે તો ૬૦ વર્ષની વયમર્યાદાને જોતાં તેમના માટે આ ટર્મ પહેલી અને છેલ્લી ટર્મ બની રહેશે. એટલે વર્ષ ૨૦૨૬ની ચૂંટણીમાં ભાજપને ફરીથી આ વૃદ્ધોને કાપીને નવા યુવા ઉમેદવારની જાહેરાત કરવી પડશે. ઉપરાંત લોકોને પણ પાંચ વર્ષ બાદ નવા કોર્પોરેટર માટેની માનસિકતા રાખવી પડશે.