Birthday / 400 રૂપિયા પગારમાં કામ કરતા હતા સલીમ ખાન, પછી બની સલીમ-જાવેદની સુપરહિટ જોડી

• સલીમ ખાને સૌ પ્રથમ એક્ટિંગથી પોતાના કરિયરની શરૂઆત કરી હતી
• જાવેદ-અખ્તરની જોડી 70 અને 80ના દાયકામાં સૌથી વધુ ચાર્જ લેનાર જોડી હતી
• સલીમ ખાનને મહિનાના 400 રૂપિયા પગાર પર રાખ્યા હતા

સલીમ ખાનનો જન્મ 24 નવેમ્બર 1935ના રોજ ઈન્દોરમાં થયો હતો. સલીમ ખાનના પિતા પોલીસ અધિકારી હતા અને બાળપણમાં જ તેમની માતાનું અવસાન થઈ ગયું હતું. સલીમ ખાને 1964માં મરાઠી છોકરી સુશીલા ચરક સાથે લગ્ન કર્યા, જેનું નામ પછીથી સલમા ખાન રાખવામાં આવ્યું. સલીમ ખાન અને સલમા ખાનને 3 પુત્રો સલમાન ખાન, અરબાઝ ખાન, સોહેલ ખાન અને એક પુત્રી અલવીરા ખાન થયા. સલીમ ખાને 1981માં એક્ટ્રેસ હેલેન સાથે લગ્ન કર્યા હતા અને અર્પિતા નામની યુવતીને દત્તક લીધી હતી. સલીમ ખાનનો પરિવાર બોલિવૂડના મોટા પરિવારોમાંથી એક છે.

તે સમયના ડિરેક્ટર અમરનાથે એક લગ્નમાં સલીમ ખાનને જોયા હતા અને તેમને મુંબઈ બોલાવી લીધા, પછી સલીમ ખાનને મહિનાના 400 રૂપિયા પગાર પર એક્ટિંગ કરવાની તક આપી હતી. એક એક્ટર તરીકે, સલીમ ખાને લગભગ 14 ફિલ્મો કરી હતી. જેમાં તીસરી મંઝિલ, દીવાના, વફાદાર, સરહદી લૂટેરા જેવી ફિલ્મ્સ સામેલ છે. આ ફિલ્મોમાં સલીમે નાના-મોટા રોલ પ્લે કર્યા હતા. આ જ કારણથી તેઓ એક એક્ટર તરીકે દર્શકોનું ધ્યાન આકર્ષિત કરી શક્યા નહીં.

આ રીતે જાવેદ અખ્તરને મળ્યા સલીમ ખાન

ફિલ્મ 'સરહદી લુટેરા'ના શૂટિંગ દરમિયાન સલીમ ખાનના નસીબ ખુલી ગયા. આ દરમિયાન તેમની મુલાકાત એ જ ફિલ્મના 'ક્લેપ બોય' જાવેદ અખ્તર સાથે થઈ અને બસ ત્યારથી સલીમ-જાવેદની સુપરહિટ જોડી બની ગઈ. તે સમયના સુપરસ્ટાર રાજેશ ખન્નાએ પહેલી વખત સલીમ-જાવેદને તેમની ફિલ્મ 'હાથી મેરે સાથી'ની પટકથા લખવાની તક આપી હતી અને આ ફિલ્મની તમિલ રિમેક 'નલ્લા નેરમ' પણ બનાવવામાં આવી હતી. 

સલીમ-જાવેદની જોડીએ લગભગ 25 ફિલ્મોમાં સાથે કામ કર્યું હતું

સલીમ-જાવેદની જોડીએ લગભગ 25 ફિલ્મોમાં સાથે કામ કર્યું હતું, જેમાં કેટલીક ફિલ્મો સુપર ડુપર હિટ રહી હતી. આ બંને જોડીની ફિલ્મોમાં 'યાદો કી બારાત', 'જંજીર', 'મજબૂર', 'હાથ કી સફાઇ', 'દીવાર', 'શોલે', 'ડોન', 'ત્રિશૂલ', 'શાન', 'શક્તિ' જેવી ફિલ્મો સામે. હતી. સલીમ ખાન અને જાવેદ અખ્તરની જોડી 70 અને 80ના દાયકામાં સૌથી વધુ ચાર્જ લેનાર રાઈટર જોડી હતી.

ફોટો સૌજન્ય- સલીમ ખાનના ઈન્સ્ટાગ્રામ પરથી સાભાર.