રાહુલ ગાંધીને ફરી કોંગ્રેસ અધ્યક્ષ બનાવવા માટે ફરી એકવાર કોંગ્રેસ પાર્ટીની અંદર માંગ તેજ બની છે. એવામાં રાહુલ ગાંધીએ જવાબ આપતા માત્ર એટલું કહ્યું છે કે તેઓ તેના પર વિચાર કરશે.
CWC બેઠકમાંથી કોંગ્રેસ અધ્યક્ષને લઇ મોટા સમાચાર
રાહુલ ગાંધીને ફરી અધ્યક્ષ બનાવવા માંગ તેજ બની
કોંગ્રેસનાં વરિષ્ઠ નેતાએ કહ્યું કે બધાએ એક મત થઈને પ્રસ્તાવ મૂક્યો
રાહુલ ગાંધીએ શું આપ્યો જવાબ
રાહુલ ગાંધીને ફરી કોંગ્રેસ અધ્યક્ષ બનાવવા માટે ફરી એકવાર કોંગ્રેસ પાર્ટીની અંદર માંગ તેજ બની છે. કોંગ્રેસ વર્કિંગ કમિટીની બેઠકમાં ફરીવાર રાહુલ ગાંધી જ પાર્ટીના અધ્યક્ષ બની જાય તે માટે માંગ કરવામાં આવી હતી. એવામાં રાહુલ ગાંધીએ પણ જવાબ આપતા માત્ર એટલું કહ્યું છે કે તેઓ તેના પર વિચાર કરશે.
નેતાઓએ સાથે મળીને ઉઠાવી માંગ
બેઠકમાં કોંગ્રેસનાં વરિષ્ઠ નેતા મલ્લિકાર્જુન ખડગેએ કહ્યું કે બધાએ એક મત થઈને પ્રસ્તાવ મૂક્યો છે કે રાહુલ ગાંધી પાર્ટીના અધ્યક્ષ બની જાય. અમારા બધાની ઈચ્છા છે કે રાહુલ ગાંધી અધ્યક્ષ બને, જોકે નિર્ણય તેમનાં પર છોડવામાં આવ્યો છે. આ સિવાય અંબિકા સોનીએ પણ કહ્યું કે બધા એક મત થઈને તેમને પ્રેસિડેન્ટ બનાવવા માટે આગળ આવ્યા છે.
બેઠકમાં સોનિયા ગાંધીનું આક્રમક વલણ
કોંગ્રસ પાર્ટીની અંદર છેલ્લા ઘણા સમયથી નેતાઓની અંદરો અંદર જ ભારે ઘમાસાણ ચાલી રહ્યો છે. કોંગ્રેસમાં 23 નેતાઓનો એક વર્ગ છે જે વારંવાર કોંગ્રેસ હાઇકમાંડ સામે જ સવાલો ઉઠાવી રહ્યા હતા અને પાર્ટીની અંદર અધ્યક્ષ પદ માટે ચૂંટણીની માંગ કરવામાં આવી હતી. એવામાં આજે CWCની બેઠક મળી હતી જેમા સોનિયા ગાંધીએ નામ લીધા વિના તમામ નેતાઓને કડક સંદેશ પાઠવી દીધો છે.
સોનિયા ગાંધીએ આજે બેઠકમાં કહ્યું કે હું જ પાર્ટીની ઓલટાઈમ અધ્યક્ષ છું. હું પાર્ટીના નેતાઓ સાથે ખુલ્લા મનથી વાત કરું છું અને મારી સાથે મીડિયાના માધ્યમથી વાત કરવાની જરૂર નથી. હું જાણું છું કે હું કાયમી અધ્યક્ષ નથી, કોરોના વાયરસનાં કારણે પાર્ટીમાં ચૂંટણી થઈ શકી નથી. હવે પાર્ટીનાં સંગઠનની ચૂંટણી માટે કાર્યક્રમ જાહેર કરવામાં આવશે.
CWC બેઠકમાંથી કોંગ્રેસ અધ્યક્ષને લઇ મોટા સમાચાર
નોંધનીય છે કે આજની બેઠક બાદ સૂત્રો દ્વારા મળતી માહિતી અનુસાર કોંગ્રેસને નવા અધ્યક્ષ મળતા હજુ એક વર્ષનો સમય લાગશે. આજની બેઠકમાં ચૂંટણીને લઈને ચર્ચા કરવામાં આવી છે અને સંગઠન મહાસચિવ કેસી વેણુગોપાલે તમામ હાજર નેતાઓને તેની જાણ કરી છે. બેઠકમા સૂત્રો દ્વારા મળ્યું છે હજુ એક વર્ષ બાદ કોંગ્રેસનાં નવા પાર્ટી અધ્યક્ષની જાહેરાત કરવામાં આવશે.