લીલી છમ વેલી ? / અમરેલી નગરપાલિકામાં ખાટલે જ મોટી ખોડ, નગરપાલિકા ખુદ ફાયરસેફ્ટી વગરની જોવા મળતા ચર્ચા

• અમરેલી નગરપાલિકામાં ખાટલે જ મોટી ખોડ 
• નગરપાલિકા ખુદ ફાયરસેફ્ટી વગરની જોવા મળી 
• સેફ્ટીના સાધનો એક્સપાયર  છતાં ઘોર બેદરકારી 

અમરેલી નગરપાલિકા સહેરી સુવિધાઓ માટે સતત પ્રયત્નશીલ હોય શકે છે પરંતુ ખુદ મહાપાલિકામાં જ સાધન-સંસાધનનો અભાવ છે. તેમાં પણ ફાયર સેફટી જેવી અત્યંત આવશ્યક સેવામાં ખામી જોવા મળતા કેટલાય પ્રશ્નો ઉઠ્યા છે. ફાયર સેફ્ટીનો આગ્રહ રાખતી અમરેલી નગરપાલિકા ખુદ ફાયરસેફ્ટી વગરની જણાતા કેટલાક સદસ્યોએ આ બાબતનો નવતર વિરોધ કર્યો હતો. 

અમરેલી નગરપાલિકા દ્વારા ફાયર સેફ્ટીને લઇ આગ્રહ રખાયો છે ત્યાએ નગરપાલિકાની બિલ્ડીંગમાં ફાયર સેફ્ટી જ  એક્સપાયરી ડેટની જોવા મળી હતી . આ બાબતનો નવતર વિરોધ કરતા વિપક્ષ દ્વારા અમેરલી ન.પા.ના ચીફઓફિસરને  ફાયર રિફિલ ભેટ આપ્યું હતું. અમરેલી ન.પા.અને જિલ્લા પંચાયતમાં 250થી વધુનો સ્ટાફ કાર્યશીલ છે અને આ બિલ્ડીંગમાં રોજીંદા હજ્જારો લોકોની અવરજવર થઇ રહી છે ત્યારે આટલી મોટી બેદરકારી સામે આવતા અમરેલી નગરપાલિકાની બાકીની સેવાઓ પર પણ લોકો પ્રશ્નાથ ભરી નજરે જોઈ રહ્યા છે. વર્ષ 2021માં તમામ ફાયર સેફ્ટીના સાધનો એક્સપાયર થયા હોવા છતાં આટલી મોટી બેદરકારી દાખવાઈ રહી હોવાની વાતે ચર્ચા જાગી છે. અમરેલી ન.પા.દ્વારા ફાયર સેફ્ટીને લઇ સિલિંગ કાર્યવાહી કરાઇ રહી છે. એક તરફ બહાર સિલિંગ કાર્યવાહી કરતી નગરપાલિકા બીજી તરફ  પોતાના તરફ પણ જુએ તેવી લોક લાગણી પ્રસરી છે.