સ્પોર્ટ્સ / આ ક્રિકેટરે IPLમાં રંગભેદનો લગાવ્યો આરોપ, કહ્યું સાથી ખેલાડીઓ 'કાલુ' કહેતા હતા

• વેસ્ટ ઇન્ડીઝના પૂર્વ કેપ્ટન ડેરેન સેમીએ IPLમાં રંગભેદનો ખુલાસો કર્યો
• IPLમાં મને અને પરેરાને લોકો 'કાલૂ' કહીને બોલાવતા હતા : સમી 
• સોશિયલ મીડિયામાં વાયરલ થઇ તસવીર 

થિસારા પરેરા અને સમી વિરુદ્ધ થતી હતી ટિપ્પણીઓ 

અત્યારે અમેરિકામાં રંગભેદ વિરુદ્ધ મોટું આંદોલન ચાલી રહ્યું છે. જ્યોર્જ ફ્લોઈડ નામના એક વ્યક્તિના મોત બાદ અમેરિકામાં રમખાણો ફાટી નીકળ્યા છે ત્યારે આઈપીએલના એક ખેલાડીએ મોટો ધડાકો કર્યો છે. વેસ્ટ ઇન્ડીઝના પૂર્વ કેપ્ટન ડેરેન સેમીએ IPLમાં રંગભેદનો ખુલાસો કર્યો છે. તેમણે આરોપ લગાવતા કહ્યું કે મેચ દરમિયાન શ્રીલંકાના થિસારા પરેરા સામે અન્ય ખેલાડીઓ વંશીય ટિપ્પણીઓ કરતા હતા. 

મને તો અત્યારે જ કાલૂ શબ્દનો અર્થ ખબર પડ્યો : સમી 

નોંધનીય છે કે સોશિયલ મીડિયામાં એક સ્ક્રીન શોટ ખૂબ વાયરલ થઇ રહ્યો છે, માનવામાં આવી રહ્યું છે કે આ તસવીર ડેરેન સેમીના ઈન્સ્ટાગ્રામ સ્ટોરીનો સ્ક્રીન શોટ છે. તેમણે આરોપ લાગાવ્યો કે આઈપીએલમાં તેને અને પરેરાને લોકો 'કાલૂ' કહીને બોલાવતા હતા. જેનો અર્થ બાદમાં ખબર પડતા આ બંને ખેલાડીઓને ખૂબ ગુસ્સો પણ આવ્યો. જોકે આરોપ લગાવવાની સાથે કોઈ ખેલાડીનું નામ જાહેર કર્યું નથી. 

IPLમાં સનરાઈઝર્સ હૈદરાબાદ તરફથી રમતો હતો સમી 

આ તસવીર અનુસાર સેમીએ લખ્યું છે કે 'મને હમણાં જ 'કાલૂ' શબ્દનો અર્થ સમજાયો. હું જ્યારે IPLમાં સનરાઈઝર્સ હૈદરાબાદ તરફથી રમતો હતો ત્યારે મને અને થિસારા પરેરાને કાલૂ કહીને બોલાવતા હતા. મને તો એમ લાગતું હતું કે કાલૂ શબ્દનો અર્થ મજબૂત ઘોડો થાય છે પણ આનો તો કંઇક અલગ જ અર્થ નીકળી રહ્યો છે અને હું ખૂબ જ ગુસ્સામાં છું.'

ક્રીસ ગેલે પણ વ્યક્ત કરી હતી વ્યથા 

નોંધનીય છે કે આ પહેલા પ્રખ્યાત ખેલાડી ક્રીસ ગેલે પણ રંગભેદનો આરોપ લગાવ્યો હતો. તેમણે કહ્યું હતું કે અશ્વેત લોકોની જીંદગીનું પણ મહત્વ છે. મેં દુનિયાની યાત્રા કરી અને પોતે જ આવી ટિપ્પણીઓનો સામનો કરવો પડ્યો છે. માત્ર ફૂટબોલ નહીં ક્રિકેટમાં પણ રંગભેદ કરવામાં આવે છે.