તંત્ર એક્શનમાં / જાહેરમાં જ્યાં ત્યાં કચરો નાખવાની ટેવ હોય તો ચેતજો! અમદાવાદમાં અનેક લોકોને નોટિસ, દુકાનો પણ થઈ સીલ

• અમદાવાદમાં જાહેરમાં કચરો નાખતા પહેલા ચેતી જજો
• જાહેરમાં કચરો નાખવા બદલ સેન્ડવીચની દુકાન કરાઈ સીલ
• ખાડિયા વોર્ડમાં 58 લોકોને જાહેરમાં ગંદકી કરવા બદલ નોટિસ
• AMCના સોલિડ વેસ્ટ વિભાગની કાર્યવાહી

અમદાવાદમાં જાહેરમાં ગંદકી અને કચરો ફેલાવનાર હવે ચેતી જજો. કારણ કે ડફનાળા ચાર રસ્તા પાસે AMCના સોલિડ વેસ્ટ વિભાગે જાહેરમાં કચરો નાખનાર ચારભુજા સેન્ડવીચની દુકાન સીલ કરી મોટી કાર્યવાહી કરી છે. આ ઉપરાંત ખાડિયા વોર્ડમાં 58 લોકોને જાહેરમાં ગંદકી કરવા બદલ નોટિસ ફટકારવામાં આવી છે.

AMCના સોલિડ વેસ્ટ વિભાગની કાર્યવાહી
કોર્પોરેશન દ્વાર નરોડા, બાપુનગર, કૃષ્ણનગર, ઠક્કરબાપાનગર, કુબેરનગર સહિતના વિસ્તારોમાં કાર્યવાહી કરવામાં આવી છે. સાથે ચાની કીટલી, પાન ગલ્લાવાળા કુલ 609 લોકોને પણ નોટિસ ફટકારી છે. AMCના સોલિડ વેસ્ટ વિભાગે ગંદકી, જાહેરમાં કચરો નાખવા મુદ્દે નોટિસ આપી 12 હજારનો દંડ વસૂલ્યો છે.

કુલ 12 હજાર 600નો દંડ ફટકાર્યો
અમદાવાદ મ્યુનિ. કમિશનર દ્વારા જાહેરમાં કચરો નાખનારાઓ સામે કાર્યવાહી કરવાની સૂચના આપવામાં આવતા  સોલિડ વેસ્ટ વિભાગની ટીમ એક્શનમાં આવી હતી. શાહીબાગ વિસ્તારમાં ડફનાળા ચાર રસ્તા પાસે આવેલી ચારભુજા સેન્ડવીચ નામની દુકાનના માલિકે જાહેરમાં કચરો નાખતા તેમની દુકાનને સીલ મારી સોલિડ વેસ્ટ વિભાગ દ્વારા કડક કાર્યવાહી કરવામાં આવી હતી. સાથે જ સોલિડ વેસ્ટ વિભાગે કુલ 609 લોકોને ગંદકી અને જાહેરના કચરો નાખવા મુદ્દે નોટિસ આપી રૂ. 12,600નો દંડ ફટકાર્યો હતો. સોલિડ વેસ્ટ વિભાગ દ્વારા  ચાની કીટલી સહિત પાનના ગલ્લાવાળાને ગંદકી નહીં કરવાની સૂચના આપવામાં આવી છે.

તાત્કાલિક ધોરણે રોડ બનાવવાની અપાઈ સૂચના
ગુજરાતમાં વિધાનસભાની ચૂંટણી જાહેર થઈ ચૂકી છે. રાજ્યમાં બે તબક્કામાં ચૂંટણી યોજાવાની છે. આગામી વિધાનસભાની ચૂંટણીને ધ્યાને રાખીને અમદાવાદ શહેરમાં આવેલા તમામ મતદાન મથક સુધી જતા રસ્તાઓના પેચવર્ક અથવા રિસરફેસિંગ કરવાની જરૂર હોય ત્યાં નવા રોડ બનાવવાનો આદેશ સંબંધિત અધિકારીઓને આપી દેવામાં આવ્યો છે. 

સફાઈ મામલે પણ અધિકારીઓને અપાઈ હતી સૂચના
ઉપરાંત શહેરમાં જે રસ્તાઓ પર હજુ સુધી પેચ વર્ક અથવા રિસરફેસ કરાયું નથી ત્યાં તાત્કાલિક ધોરણે કામગીર કરવાની પણ સૂચના આપી દેવામાં આવી છે. અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીમાં શહેરમાં સફાઈ મામલે પણ અધિકારીઓને સૂચના આપી દેવાઈ છે.