રાજકારણ / "વ્યાજ આપ નહી તો... તું મને ઓળખતો નથી" કોંગ્રેસના ધારાસભ્યની કથિત ઓડિયો ક્લિપ સામે આવતા વિવાદ સર્જાયો

• MLA રઘુ દેસાઈનો કથિત ઓડિયો વાયરલ
• પૈસા મુદ્દે આપે છે ધમકી
• રઘુ દેસાઇએ ઓડિયો ક્લીપને ખોટી ગણાવી

રાધનપુરના ધારાસભ્ય રઘુ દેસાઇનો કથિત ઓડિયો વાયરલ થયો છે. જેમાં તેઓ જમીન લે-વેચ મુદ્દે ધમકી આપી રહ્યાં છે. રઘુ દેસાઇ જમીન લે-વેચના બાકી નીકળતાં પૈસા મુદ્દે ઓડિયોમાં ધમકી આપી રહ્યા છે. અને ઓડિયોમાં કહે છે કે વ્યાજ નહીં આપે તો તને લાંબો કરી દઇશ. તું કોને સાથે વાત કરે છે ખબર છે તને. ખોટી જમીન છે પૈસા આપ અથવા વ્યાજ આપ તેવી ઓડિયોમાં વાત કરવામાં આવી રહી છે. ત્યારે કથિત ઓડિયો મુદ્દે રઘુ દેસાઇએ કહ્યું કે, આ ઓડિયો ડુપ્લીકેટ છે. અને મને બદનામ કરવાનું ષડયંત્ર છે.

ધારાસભ્ય રઘુ દેસાઈએ આપ્યું નિવેદન

રાધનપુરના ધારાસભ્ય રઘુ દેસાઈએ પોતાના કથિત ઓડિયો વિશે ખુલાસો આપતા કહ્યું કે, આ એકદમ બનાવટી ઓડિયો ક્લિપ છે. હું એક વેપારી માણસ છું. ઓડિયોમાં જે પ્રકારે ગાળો બોલવામાં આવી તેવી ભાષાનો પ્રયોગ હું કરતો નથી. આજે કોઈપણનો અવાજ કાઢી તેને બદનામ કરી શકાય છે. મને પણ કેટલાક લોકો બદનામ કરવાની કોશિશ કરી રહ્યા છે. મારો બનાવટી અવાજ કાઢી આ ઓડિયો બનાવ્યો છે. હું આ અંગે તપાસની ફરિયાદ કરીશ. અને સત્ય સામે આવી જશે.