અમદાવાદ / 2 દિવસનાં નવજાત બાળકને લઈને પરીક્ષા આપવા પહોંચી માતા

જીવનમાં ડગલે ને પગલે પરીક્ષા આવતી હોય છે કેટલાંકમાં નાપાસ થઈએ છીએ તો કેટલી પરીક્ષામાં પાસ થઈ જઈએ છીએ. જો કે તેમ છતાં નિરાશાને પાસે ન ઢૂંકવા દેવી તે જ તો મોટી પરીક્ષા હોય છે. માત્ર પાઠશાળા જ નહીં જીવન પણ ઘણી વાર પરીક્ષા લેતી હોય છે. તેમાં ભલે અવ્વલ ન આવીએ પરંતુ પરીક્ષા તો આપવી જ પડે છે. આ હિંમત કેળવાય છે ત્યારે સફળતાની શક્યતા વધી જાય છે.

આ વાત કદાચ એ માતા સારી રીતે જાણી ચૂકી હશે કે જેને પુત્રીને જન્મ આપ્યાનાં તુરંત બે દિવસ બાદ બી.એડ. સેમેસ્ટર-2ની પરીક્ષા આપવી પડે તેવી કસોટી યોગમાં મૂકાવું પડ્યું. ટેબલ પર પોતાનાં નવજાત શિશુને સૂવડાવીને જાગેલાં સવાલોનાં જવાબ આપવા પરીક્ષા આપી રહેલી આ નવજાત શિશુની માતાનું નામ છે ધર્મિષ્ઠાબેન પટેલ.

સાણંદમાં રહેતા આ  ધર્મિષ્ઠાબેને હજુ સંતાન પ્રાપ્તિ થઈને બે દિવસ પસાર થયાં છે. ત્યારે કરિયરની પરીક્ષા ન ચૂકી જવાય તે માટે તેમને પોતાનાં નવજાત શિશુને સાથે લઈને જ પરીક્ષાખંડમાં આવવું પડ્યું છે. જો કે,કોલેજનાં સંચાલકો દ્વારા યુવતી માટે અલગ થી એક ક્લાસરૂમની વ્યવસ્થા ઉભી કરાઈ છે.

આટલું નાનું સંતાન માતા વિના એકલું ના રહી શકે અને કદાચ માતા બે દિવસનાં શિશુને ઘરે મૂકીને આવે તો તેણીનું પરીક્ષામાં ધ્યાન કેન્દ્રીય ન જ થઈ શકે તેમાં બે મત નથી. ટેબલ પર નિરાંતે સૂતેલું બાળક અને પરીક્ષા પ્રક્રિયામાંથી પસાર થઈ રહેલી માતા જીવનની એ કહાનીનું આબેહૂબ ચિત્ર ખડું કરે છે જેમાં સંતાનોની નિરાંત માટે માતા પિતાએ અનેક પરીક્ષાઓ પાસ કરવી પડતી હોય છે. સંતાનો સૂતા હોય છે અને માતા-પિતા જીવનનાં અનેક સવાલો સામે ઝઝૂમતા હોય છે. વળી આ દ્રશ્ય એ પણ કહે છે કે આધુનિક યુગની એક માતાને બાળ ઉછેર અને કરિયર વચ્ચે કેટલું બેલેન્સ કરવું પડે છે. પરંતુ આ માટે પરિવારજનોનો સાથ મળવો પણ ખૂબ આવશ્યક હોય છે.

અડગ મનનાં માનવીને હિમાલય પણ નડતો નથી. આ ઉક્તિને સાર્થક કરતી આ માતાની દ્રઢતા અને આત્મબળનાં સાક્ષી આપણે સૌ તો બની રહ્યાં છીએ પરંતુ એક માતાનાં સંઘર્ષને તેમનું સગુ સંતાન બિલકુલ નજીકથી અને એ જ ટેબલ પરથી અનુભવી રહ્યું છે કે જે ટેબલ પર તેની માતા સવાલનો જવાબ લખી રહી છે અને આખરે એ લાડકીની નિરાંત માટે તો આ બધી મહેનત છે.