ભ્રષ્ટાચારની આશંકા / અમદાવાદમાં કોંગ્રેસના કોર્પોરેટરોનો વેન્ટિલેટર બાબતે હોબાળો, હિસાબ ન મળતા કહ્યું, ભ્રષ્ટાચારની આવે છે ગંધ

• અમદાવાદમાં AMC દ્વારા વેન્ટિલેટર ખરીદવાનો વિવાદ વકર્યો
• કોર્પોરેટર્સના બજેટમાંથી ખરીદાયા હતા વેન્ટિલેટર 
• વેન્ટિલેટરની ફાળવણી મામલે કોંગ્રેસ આક્રમક

અમદાવાદમાં AMCએ ખરીદેલા વેન્ટિલેટરનો વિવાદ વકર્યો છે. વેન્ટિલેટરની ખરીદીમાં ભ્રષ્ટાચાર થયાની કોંગ્રેસ કોર્પોરેટરોને આશંકા છે. જે મામલે કોંગ્રેસના કોર્પોરેટરોએ સ્ટેન્ડિંગ કમિટીની મિટિંગમાં પણ હોબાળો કર્યો હતો. 

મહત્વનું છે કે, ગઈકાલે પણ સ્ટેન્ડિંગ કમિટીની બેઠકમાં વેન્ટિલેટરની ખરીદીનો હિસાબ આપવા મામલે કોંગ્રેસના કોર્પોરેટરોએ હોબાળો કર્યો હતો. કોર્પોરેશન દ્વારા તમામ કોર્પોરેટરની ગ્રાન્ટમાંથી 5 લાખનો ખર્ચ કરવામાં આવ્યો છે. ભાજપના 160 અને કોંગ્રેસના 24 કર્પોરેટર્સે ફાળવ્યા નાણાં હતા. અને 250 જેટલા વેન્ટિલેટરની ખરીદી કરવામાં આવી હતી. આ મામલે હવે કોંગ્રેસને આ ખરીદીમાં ભ્રષ્ટાચારનીં ગંધ આવી રહી છે.  વેન્ટિલેટરની ખરીદી મામલે મેયરને આવેદનપત્ર પણ અપાયું છે. 

ગુરુવારની સ્ટેન્ડિંગ કમિટીમાં કોંગ્રેસે માગ્યો હતો હિસાબ

ગઈકાલ ગુરુવારે સ્ટેન્ડિંગ કમિટીની બેઠક મળી હતી. જેમાં કોંગ્રેસના કોર્પોરેટરો દ્વારા પોતાની ગ્રાન્ટમાંથી જે વેન્ટિલેટર ખરીદી કરવામાં આવ્યા તેનો હિસાબ માગવામાં આવ્યો હતો. પરંતુ મનપા કમિશનરે સ્ટેન્ડિંગ કમિટીમાં હિસાબ આપવાની ના પાડતા હોબાળો થયો હતો. ત્યારે કોંગ્રેસના સભ્યોએ કહ્યું હતું કે, અમને આ ખરીદીમાં ભ્રષ્ટાચારની ગંધ આવી રહી છે. જે બાદ કમિશનરે પણ કહ્યું કે, કોર્પોરેટરો કોન્ટ્રાક્ટરની વિગત માગી રહ્યા છે. તો મને પણ અજુગતું લાગી રહ્યું છે. 

મનપા કમિશનરે સ્ટેન્ડિંગ કમિટીમાં હિસાબ આપવાની ના પાડી હતી. સાથે કહ્યું કે, આ વેન્ટિલેટરની ખરીદી મેટ હેઠળ કરાઈ છે. સ્ટેન્ડિંગ કમિટીને તેની જાણ કરી શકાય નહીં. AMCમાં મેટના સભ્યોને તેની જાણ કરાશે. અને તેના માટે જ્યારે મેટની બેઠક મળશે. ત્યારે તેની જાણ કરવામાં આવશે.