મહિલાઓ અને યુવતીઓ માટે અમદાવાદ શહેર અસુરક્ષિત બન્યું હોય તેમ લાગી રહ્યું છે, કારણ કે થોડા દિવસ પહેલાં સોલા અને નવરંગપુરા વિસ્તારમાં છેડતીના બે બનાવ સામે આવ્યા છે, જેમાં સોલામાં જાહેરમાં યુવતી મોર્નિંગ વોક કરવા નીકળી હતી, ત્યારે બાઈકચાલકે તેની છેડતી કરવાની ઘટના બની હતી. ત્યારે ફરી એક વાર જાહેર રોડ પર યુવતીની છેડતી કરી હોવાનો વધુ એક કિસ્સો સામે આવ્યો છે.
ખોખરા વિસ્તારમાં યુવતી અને તેની બહેન મોડી રાતે ચાલવા નીકળ્યાં હતાં તે દરમિયાન પાડોશમાં રહેતો એકતરફી પાગલ પ્રેમીએ જાહેર રોડ પર યુવતીને ઊભી રાખીને આઈ લવ યુ કહીને તેનો હાથ પકડી લેતાં મામલો પોલીસ સ્ટેશન સુધી પહોંચ્યો છે.
ખોખરામાં રહેતી યુવતીએ એક યુવક વિરુદ્ધમાં ફરિયાદ કરી છે. ફરિયાદમાં જણાવ્યા મુજબ ર૦ વર્ષીય યુવતી એક ખાનગી કંપનીમાં નોકરી કરે છે. તે તેનાં માતા-પિતા, ભાઈ અને બે બહેન સાથે રહે છે. બે દિવસ પહેલાં રાત્રીના સવા અગિયાર વાગ્યાની આસપાસ યુવતી અને તેની બહેન જાહેર રોડ પર ચાલવા નીકળ્યાં હતાં. ત્યારે યુવતીની ચાલીમાં રહેતો અમિત થાપા તેનો પીછો કરતો હતો.
તે સમયે અમિતે યુવતી અને તેની બહેનને જાહેર રોડ પર ઊભાં રાખ્યાં હતાં અને યુવતીનો જાહેરમાં જ અમિતે આઈ લવ યુ કહીને હાથ પકડીને જાતીય સતામણી કરવા લાગ્યો હતો, જેથી યવતીએ બૂમાબૂમ કરતાં અમિત નાસી ગયો હતો અને પોતાનાં માતા-પિતાને જાણ કરી હતી અને ખોખરા પોલીસ સ્ટેશનમાં યુવક વિરુદ્ધમાં ફરિયાદ કરી હતી.
તમને જણાવી દઇએ કે, થોડા દિવસ પહેલાં સોલા વિસ્તારમાં રહેતી સગીરા વહેલી સવારે મોર્નિંગ વોક કરી રહી હતી, ત્યારે થલતેજમાં આવેલ તિનમૂર્તિ બંગલોઝમાં રહેતા ૩૮ વર્ષના પાર્શ્વ શાહે બુલેટ પર આવી તેની છેડતી કરી ભાગી ગયા બાદ સીસીટીવી કેમેરામાં તે કેદ થઈ ગયો હતો અને પોલીસે ગણતરીના કલાકોમાં ધરપકડ કરી હતી.