હિટવેવની આગાહીને કારણે હવામાન વિભાગે બપોરના સમયે ઘરની બહાર ન નીકળવાની સલાહ આપી છે.
રાજ્યમાં એપ્રિલ મહિનાની શરુઆતથી જ આકરી ગરમી આગાહી
રાજ્યમાં આગામી 5 દિવસ હીટવેવ સાથે યલો એલર્ટ જાહેર
1 થી 3 એપ્રિલ સુધી સૌરાષ્ટ્ર-કચ્છના શહેરોમાં રહેશે હીટવેવ
ગુજરાતમાં આજથી પાંચ દિવસ હીટવેવની આગાહી
આ વર્ષે ગરમી હવે પીછો છોડવાની હોય તેમ લાગતું નથી, એક બે દિવસના વિરામ બાદ સતત હીટવેવની ચેતવણી હવામાન વિભાગ દ્વારા આપવામાં આવી રહી છે. ત્યારે એપ્રિલ મહિનાની શરૂઆતથી યલો અને ઓરેન્જ એલર્ટ સાથે આકરો તાપ સહન કરવો પડશે. રાજ્યના હવામાન વિભાગના જણાવ્યા અનુસાર આગામી દિવસોમાં ગરમી વધુ કેટલાક રેકોર્ડ તોડે તેવી સંભાવનાઓ વ્યક્ત કરાઈ રહી છે.
આગામી પાંચ દિવસ સરેરાશ તાપમાન 43 ડિગ્રી આસપાસ રહી શકે છે
હવામાન વિભાગના સૂત્રોના જણાવ્યા અનુસાર, દક્ષિણ પશ્ચિમથી પશ્ચિમના સૂકા ગરમ પવનને લીધે ગુરૂવારે અમદાવાદ સહિત ચાર શહેરમાં ગરમીનો પારો 42 ડીગ્રીને વટાવી ગયો હતો. જોકે શુક્રવારથી 4 દિવસ અમદાવાદ સહિત રાજ્યમાં હીટવેવની આગાહી છે. આ સમય દરમિયાન ગરમી 43 ડીગ્રીને વટાવી જવાની શક્યતા છે
સૌરાષ્ટ્ર, કચ્છ અને ઉત્તર ગુજરાતમાં યલો અલર્ટ
હવામાન વિભાગ દ્વારા આગામી પાંચ દિવસ દરમિયાન યલો એલર્ટ રહેવાની આગાહી કરવામાં આવી છે. તેમજ અમદાવાદ, ગાંધીનગર સહિત સૌરાષ્ટ્ર, કચ્છ અને ઉત્તર ગુજરાતમાં હીટવેવની અસર આગામી કેટલાક દિવસો સુધી રહેશે. તેમજ "આજથી સૌરાષ્ટ્ર અને ગુજરાતના અન્ય ભાગોમાં પણ હીટવેવની અસર આગામી કેટલાક દિવસો દરમિયાન રહેશે.ગરમીનું પ્રમાણ વધવાથી સાવચેતી રાખવાની પણ સલાહ હવામાન વિભાગ દ્વારા આપવામાં આવી છે. જેમાં તાજેતરમાં જન્મેલા બાળકો, વૃદ્ધ વ્યક્તિ અને ગંભીર બીમારીથી પીડાતા લોકોને ગરમીથી બચવાની સલાહ આપવામાં આવી છે. આ સાથે પુરતા પ્રમાણમાં પ્રવાહી લેવાની અને ગરમીમાં બહાર જવું પડે તો માથું ઢંકાય તેનું ધ્યાન રાખવાની સલાહ આપવામાં આવી છે.
2 એપ્રિલથી ચાર એપ્રિલ અમદાવાદમાં હીટવેવ રહેશે
શુક્રવારથી ચાર દિવસ અમદાવાદ સહિત રાજ્યમાં હીટવેવની આગાહી કરવામાં આવી છે. આ ચાર દિવસમાં ગરમીનો પારો 43 ડીગ્રીને વટાવી જવાની શક્યતા છે. હીટવેવની સૌથી વધુ અસર અમદાવાદ સહિત ઉત્તર ગુજરાતના ગાંધીનગર, બનાસકાંઠા, સાબરકાંઠા, પાટણ, મહેસાણા તેમજ સૌરાષ્ટ્રના રાજકોટ, ગીર સોમનાથ, બોટાદ, સુરેંદ્રનગર, અમરેલી અને કચ્છ જિલ્લામાં વર્તાય એવી શક્યતા છે. અમદાવાદમાં પણ સતત વધી રહેલી ગરમીને લીધે મહાનગરપાલિકાએ આગામી 5 દિવસ યેલો એલર્ટ જાહેર કર્યું છે. 2 એપ્રિલથી ચાર એપ્રિલ અમદાવાદમાં હીટવેવ જાહેર કરવામાં આવ્યું છે.