અમદાવાદના વસ્ત્રાલમાં થયેલ હિટ એન્ડ રન મામલે નવો ઘટસ્ફોટ થયો છે જેમાં પત્નીએ અકસ્માતના બહાને પતિની હત્યા કરાવી હોવાનું સામે આવ્યું છે.
અમદાવાદના વસ્ત્રાલમાં હિટ એન્ડ રનનો મામલો
પત્નીએ અકસ્માતના બહાને પતિની કરાવી હત્યા
રૂ.10 લાખની સોપારી આપી હત્યા કરાવ્યાનો ધડાકો
અમદાવાદના વસ્ત્રાલમાં થોડા દિવસ અગાઉ હિટ એન્ડ રનની ઘટના પ્રકાસમાં આવી હતી. જે ઘટનામાં બેફામ સ્પીડે આવતી પીકઅપ વાન ચાલકે યુવાનને અડફેટે લીધો હતો. આ અકસ્માતમાં શૈલેષ પ્રજાપતિ નામનો યુવાન કાળનો કોળિયો બની ગયો હતો. આ મામલે પોલીસ તપાસમાં મોટો ઘટસ્ફોટ થયો છે. જેમાં પત્નીએ જ અકસ્માતના બહાને પતિને પતાવી દીધો હોવાનું સામે આવતા હડકંપ મચી ગયો છે આ અંગે જાણ થતા પોલીસ પણ ચોંકી ગઈ હતી. મૃતક યુવાનની પત્નીએ પ્રેમી સાથે મળીને રૂપિયા 10 લાખની સોપારી આપી હતી. ત્યારબાદ પતિનું હિટ એન્ડ રનના નામે કાસળ કાઢી નાખ્યું હોવાનો ધડાકો થયો છે. પોલીસ તપાસમાં આ ઘટનાના રહસ્ય પરથી પરદો ઊંચકી જતા સનસનાટી મચી જવા પામી હતી.
ક્રાઇમ બ્રાન્ચે પત્ની સહિત બે આરોપીની કરી ધરપકડ
જેને પગલે અમદાવાદ ક્રાઇમ બ્રાંચને આ મામલે કશુ અજુગતું લગતા તેમણે ઊંડી તપાસ હાથ ધરી હતી. આ અકસ્માત નહિ પરંતુ હત્યા હોવાની ક્રાઈમ બ્રાન્ચને કાને વાત પડી હતી. યુવાનની પત્ની શારદા અને તેનો પ્રેમી નીતિન પ્રજાપતિએ જ હત્યા માટે સોપારી આપી હોવાની જાણ થતા પોલીસે તપાસ હાથ ધરી હતી જેમાં બંનેએ ગોમતીપુરમાં રહેતા યાસીનને અકસ્માત કરાવવા 10 લાખ રૂપિયા આપ્યા હોવાનું સામે આવ્યું હતી. જે બાદ યાસીને પ્લાન બનાવીને પીકઅપ વાન મૃતક શૈલેષ પ્રજાપતિ પર ચઢાવી તેને મોતને ઘાટ ઉતારી દીધો હતો.
પ્રેમસબંધમાં આડખીલી રૂપ પતિનો રસ્તાઓ કાઢવા હત્યા કરી
પોલીસે મૃતકની પત્ની સહિતનાઓની આગવી ઢબે પૂછતાછ કરતાં હત્યાનો ભેદ ઉકેલાયો હતો. જેમાં આરોપી નીતિન પ્રજાપતિ અને મૃતક શૈલેષ પ્રજાપતિ એક જ ગામના હોય અને અઢી વર્ષથી આરોપી નીતિન તેમના ઘરે આવતો જતો હતો. જેમાં નીતિનને મૃતક શૈલેશની પત્ની શારદા સાથે આંખ મળી ગઇ હતી. ત્યારબાદ બંને મળતા પણ હતા જેમાં 2 વર્ષ અગાઉ શૈલેષને પ્રેમ સબંધ અંગે જાણ થતા પતિ પત્નીમાં અવારનવાર માથાકૂટ થતી હતી જેથી પ્રેમસબંધમાં આડખીલી રૂપ પતિનો રસ્તાઓ કાઢવા હત્યા અંગેનો પ્લાન 6 માસ અગાઉ બનાવ્યા બાદ હત્યા કરી હોવાનું સામે આવ્યું છે. જેને પગલે પોલીસે મૃતકના પત્ની અને પ્રેમીને દબોચી લીધા છે જ્યારે આરોપી યાસીનની તપાસ હાથ ધરી છે.
શુ હતી સમગ્ર ઘટના?
ગત તા. 24 રોજ અમદાવાદના વસ્ત્રાલમાં હિટ એન્ડ રનની ઘટના ઘટી હતી. ત્યારે વસ્ત્રાલમાં બનેલી આ ઘટનાના CCTV ફૂટેજ સામે આવ્યા હતા.મહત્વનું છે કે, વસ્ત્રાલમાં એક પીકઅપ વાનચાલક રાહદારીને અડફેટે લઈને ફરાર થઇ ગયો હતો. જે ઘટનામાં શૈલેષ પ્રજાપતિ નામના યુવકનું મોત નિપજ્યું હતું. ત્યારબાદ ઘટનાને લઈને પરિવાર તેમજ સ્થાનિક લોકો મોટી સંખ્યામાં ઉપસ્થિત થયા હતા અને લોકોએ ભારે રોષ ઠાલવી યુવાનના પરિવારજએ તાત્કાલિક વાહનચાલકને પકડવાની માંગ ઉઠાવી હતી.