રાજનીતિ / 2022ની ચૂંટણી પહેલા કોંગ્રેસને ફરી જોરદાર ઝટકો: હવે આ નેતાએ મોટા પદથી ધરી દીધું રાજીનામું 

• હિમાચલ પ્રદેશમાં વિધાનસભા ચૂંટણી પહેલા કોંગ્રેસને મોટો ઝટકો
• પૂર્વ કેન્દ્રીય મંત્રી આનંદ શર્માએ સંચાલન કમિટીના અધ્યક્ષપદેથી આપ્યું રાજીનામું 
• હિમાચલ પ્રદેશમાં 2022ના અંતમાં ચૂંટણી યોજાનાર છે 

હિમાચલ પ્રદેશમાં વિધાનસભા ચૂંટણી પહેલા કોંગ્રેસને મોટો ઝટકો લાગ્યો છે. વિગતો મુજબ પૂર્વ કેન્દ્રીય મંત્રી આનંદ શર્માએ રવિવારે પાર્ટીની સંચાલન કમિટીના અધ્યક્ષપદેથી રાજીનામું આપી દીધું છે. કોંગ્રેસ અધ્યક્ષ સોનિયા ગાંધીને લખેલા પત્રમાં તેમણે કહ્યું કે, પાર્ટીમાં તેમની અવગણના કરવામાં આવી રહી છે. હિમાચલ ચૂંટણીના મહત્વના નિર્ણયોમાં તેમનું ધ્યાન આપવામાં આવ્યું ન હતું. જોકે હવે વર્ષ 2022ના અંતમાં હિમાચલ પ્રદેશમાં ચૂંટણી યોજાનાર હોઇ આ રાજીનામું કોંગ્રેસ માટે મોટો ઝટકો માની શકાય છે. 

મહત્વનુછે કે, નેતા ગુલામ નબી આઝાદે જમ્મુ અને કાશ્મીરમાં પ્રચાર સમિતિના અધ્યક્ષ પદેથી રાજીનામું આપ્યાના થોડાક દિવસો બાદ હવે આનંદ શર્માએ રાજીનામું આપ્યું છે. આનંદ શર્માએ કોંગ્રેસ અધ્યક્ષને લખેલા પત્રમાં કહ્યું છે કે, પરામર્શ પ્રક્રિયામાં તેમની અવગણના કરવામાં આવી છે. જોકે તેઓ રાજ્યમાં પાર્ટીના ઉમેદવારો માટે પ્રચાર ચાલુ રાખશે. આનંદ શર્માને એપ્રિલ 2022માં સ્ટીયરિંગ કમિટીના અધ્યક્ષ તરીકે નિયુક્ત કરવામાં આવ્યા હતા.

વિધાનસભા ચૂંટણીમાં પહેલા કોંગ્રેસને ફટકો 

કોંગ્રેસ આ વર્ષના અંતમાં યોજાનારી વિધાનસભા ચૂંટણીમાં હિમાચલ પ્રદેશમાં ભાજપ પાસેથી સત્તા છીનવી લેવાનો પ્રયાસ કરી રહી છે. આનંદ શર્માએ સૌપ્રથમ 1982માં વિધાનસભા ચૂંટણી લડી હતી અને 1984માં તત્કાલિન વડાપ્રધાન ઈન્દિરા ગાંધીએ તેમને રાજ્યસભાની ટિકિટ આપી હતી. તેઓ પાર્ટીમાં અનેક મહત્વના હોદ્દા પર રહ્યા છે. જોકે હવે તેમણે સંચાલન કમિટીના અધ્યક્ષપદેથી રાજીનામું ધરી દેતાં કોંગ્રેસ માટે મોટો ઝટકો માની શકાય છે. 

આનંદ શર્મા અને ગુલામ નબી આઝાદ જી-23 જૂથના અગ્રણી નેતાઓ છે જેઓ પક્ષના નેતૃત્વના નિર્ણયોની ટીકા કરતા હતા. ભૂપિન્દર સિંહ હુડ્ડા અને મનીષ તિવારી સહિતના અગ્રણી નેતાઓનું જૂથ બ્લોકથી લઈને CWC સ્તર સુધી વાસ્તવિક ચૂંટણીઓ માટે દબાણ કરી રહ્યું છે. આનંદ શર્માને હિમાચલ પ્રદેશના સૌથી ઊંચા નેતાઓમાંના એક ગણવામાં આવે છે. કોંગ્રેસ અધ્યક્ષને લખેલા પત્રમાં કહેવામાં આવ્યું છે કે, તેમના સ્વાભિમાનને ઠેસ પહોંચી છે કારણ કે,  તેમને પાર્ટીની કોઈપણ બેઠક માટે સલાહ કે આમંત્રણ આપવામાં આવ્યું નથી.