હવામાન વિભાગની આગાહી મુજબ આજે સવારથી કમોસમી વરસાદી ઝાપટા પડ્યા, દક્ષિણ ગુજરાતમાં ૪૦ કિ.મી પ્રતિ કલાકની ઝડપે પવન ફૂંકાયો
સુરતમાં અનેક વિસ્તારોમાં વરસાદ શરૂ
કમોસમી વરસાદને કારણે ખેડૂતોની ચિંતામાં વધારો
ઘણા જિલ્લાઑમાં પડ્યા વરસાદી ઝાપટા
આજે વહેલી સવારથી જ ઉત્તર ગુજરાતના પાટણ, પાલનપુર, મહેસાણા, ગાંધીનગર સહિત નડિયાદ અને સૌરાષ્ટ્રમાં જૂનાગઢ સાથે કચ્છ સહિત અનેક જિલ્લામાં કમોસમી વરસાદ પડ્યો છે. ઊંઝા અને બહુચરાજીમાં પોણો ઇંચ વરસાદ પડ્યો છે. નવેમ્બરની મધ્યમાં માવઠું થતાં શિયાળુ સિઝનને લઇને ઊભા પાક અને યાર્ડમાં પડેલી જણસોમાં નુકસાન થતાં ખેડૂતોના જીવ તાળવે ચોંટ્યા છે. ગુજરાતમાં કમોસમી વરસાદથી લોકો અને ખેડૂતો ચિંતાતુર બન્યા છે,
સુરતમાં બે કલાકમાં દોઢ ઈંચ વરસાદ
આજે સુરત ગ્રામ્ય વિસ્તારમાં કમોસમી વરસાદ વીજળીના ભારે કડાકા ભડાકા સાથે પડ્યો છે. સુરત શહેરમાં પણ બે કલાકમાં દોઢ ઈંચ વરસાદ ખાબકતા રસ્તા પર ચોમાસા જેવા દ્રશ્યો સર્જાયા હતા. સાંજે 4થી 6 વાગ્યા સુધીમાં 35 મીમી જેટલો વરસાદ પડ્યો હતો. ઉધના, પાંડેસરા વિસ્તારથી લઈને પાલ, અડાજણ, વરાછા વિસ્તારમાં વરસાદે કમોસમી રમઝટ બોલાવી હતી.બજારોમાં પાણી ભરાઇ ગયા હતા. નીચવાળા રસ્તાઓ પર વાહનો પાણીમાં તણાઈ રહ્યા હતા.
૪૦ કિ.મી પ્રતિ કલાકની ઝડપે પવન ફૂંકાયો
દક્ષિણ ગુજરાતના કેટલાક વિસ્તારોમાં આજે સવારે ૪૦ કિ.મી પ્રતિ કલાકની ઝડપે પવન ફૂંકાયો છે. જ્યારે ઉત્તર ગુજરાતમાં છૂટોછવાયો વરસાદ પડ્યો છે. અત્રે ઉલ્લેખનીય છે કે, રાજ્યમાં ૪૮ કલાક કમોસમી વરસાદની આગાહી કરવામાં આવી છે. દક્ષિણ ગુજરાત, ઉત્તર ગુજરાત અને સૌરાષ્ટ્રમાં વરસાદ પડશે. બનાસકાંઠા જિલ્લાના અનેક વિસ્તારમાં કમોસમી વરસાદથી ખેડૂતો ચિંતામાં મુકાયા છે. પાલનપુર માર્કેટયાર્ડમાં ખુલ્લામાં પડેલી મગફળી સહિતનો પાક પલળી જતાં ખેડૂતો અને વેપારીઓને નુકસાન થયું છે. ડીસા, લાખણી, કાંકરેજ, દાંતા, ભાભર અને થરાદ સહિતના વિસ્તારમાં વરસાદથી પાક પલળી ગયો છે.
ખેડૂતોના પાકને મોટું નુકસાન
મોરબીના માળિયા બોડકી, ઝીંઝુડા, કુંભારિયા અને ખાખરેચીમાં કમોસમી વરસાદ વરસતાં મગફળી અને કપાસ સહિતનો પાક પાણીમાં પલળી જતાં ખેડૂતોને મોટાપાયે નુકસાન થયું છે. પાટણ જિલ્લામાં એરંડાના પાકમાં જીવાત પડે તેવી શક્યતા છે. કચ્છના અનેક વિસ્તારમાં ભર શિયાળે માવઠું થયું. વાગડ, રાપર, ખેંગારપર માવઠાથી ખેડૂતો અને પશુપાલકોને ભારે નુકસાન થયું છે
આગાહી 2 દિવસ 'ભારે' છે
હવામાન વિભાગ દ્વારા હજુ બે દિવસ વરસાદી વાતાવરણ રહેવાની આગાહી કરવામાં આવી છે. અરબી સમુદ્રમાં સર્જાયેલાં લો પ્રેશરનાં વેસ્ટર્ન ડિસ્ટર્બન્સને કારણે રાજ્યમાં વરસાદ થવાની હવામાન વિભાગે આગાહી કરી છે. વાદળછાયા વાતાવરણને કારણે રાજ્યભરમાં વિઝિબિલિટી પર પણ અસર થશે. જો કે બે દિવસ બાદ ગુજરાતમાં ક્યાંય વરસાદ જોવા મળશે નહીં.