અમદાવાદના રામોલ વિસ્તારમાં એક યુવતી સાથે ગેંગ રેપની ઘટના બનતા પોલીસ દોડતી થઈ ગઈ છે. પોલીસના કહેવા પ્રમાણે યુવતીની સ્થિતી હાલ સારી નથી જેથી પ્રાથમિક નિવેદન લઈ ફરિયાદ દાખલ કરવામાં આવી છે અને વધુ તપાસ કરવામાં આવી રહી છે.
યુવતીને કેફી પીણુ પિવડાવી ગુજાર્યો બળાત્કાર
રામોલ પોલીસ સ્ટેશનમાં એક યુવતીએ પોતાની ઉપર બનેલ ઘટના વિષે જણાવતા પોલીસ પણ ચોંકી ગઈ હતી. ફરિયાદીના કહેવા પ્રમાણે તેની સાથે વારવાંર ગેંગરેપની ઘટનાને અંજામ આપવામાં આવ્યો છે. પહેલાં તેને કેફી પીણુ પિવડાવી બેહોશ કર્યા બાદ કુકર્મ આચરવામાં આવતું હતું. મળતી માહિતી પ્રમાણે યુવતી શહેરની એક કોલેજમાં પ્રથમ વર્ષમાં અભ્યાસ કરતી હતી અને જેમાં તેને એટીકેટી આવતા તે ફોર્મ ભરવા ગઈ હતી, ત્યારે એક યુવકે તેને એટીકેટીમાં પાસ કરી દેવાની ખાતરી આપી તેની સાથે મિત્રતા કેળવી હતી અને ત્યાર બાદ તેની સાથે બળાત્કાર ગુજાર્યો હતો.
ચાર નરાધમોએ કર્યો ગેંગ રેપ
નોંધનીય છે કે, એક યુવકે પહેલાં આ યુવતી સાથે બળાત્કાર કર્યો ત્યાર બાદ બીજા ત્રણ યુવકોએ આ યુવતીને એટીકેટીમાં પાસ કરાવી દેવાની વાત કરી તેને અલગ-અલગ જગ્યાએ લઈ જઈ ગેંગ રેપ કર્યો હતો. ચોંકાવનારી વાત તો એ છે કે, યુવતીને ગર્ભવતી પણ બનાવી દીધી હતી, જેથી યુવતી હાલ શારિરીક અને માનષિક રીતે અસ્વસ્થ છે અને હાલ હોસ્પીટલમાં સારવાર લઈ રહી છે. ત્યારે પોલીસનુ કહેવુ છે કે એક આરોપીનુ નામ અને સરનામુ મળી ગયુ છે ત્યારે અન્ય ત્રણ આરોપીની તપાસ કરવામાં આવી છે.
જ્યારે સવાલ એ ઉભો થાય છે કે, પોલીસ આરોપીઓની ક્યારે ધરપકડ કરે છે અને આ ઘટનામાં અન્ય કોઈ સામેલ છે કે કેમ? હાલમા તો પોલીસે યુવતીની ફરિયાદ નોંધીને આરોપીની ઓળખને લઈને કાર્યવાહી શરૂ કરી છે.