રોકાણ / બજારથી સસ્તું સોનું ખરીદવા માટે મોદી સરકારની આ સ્કીમ ફરીથી ખુલી, અરજી માટે ફક્ત 4 દિવસ બાકી

• સૉવરેન ગોલ્ડ બોન્ડ સ્કીમ રોકાણ માટે ખુલી
• બજારથી સસ્તા ભાવે કરી શકાય છે સોનામાં રોકાણ
• 10 જુલાઈ છે અરજીની છેલ્લી તારીખ

જો તમે સસ્તા ભાવના સોનામાં રોકાણ કરવા ઈચ્છો છો તો મોદી સરકારની સૉવરેન ગોલ્ડ સ્કીમ ચોથી વખત તમારા માટે આવી ચૂકી છે. તેની શરૂઆત સોમવાર એટલે કે 6 જુલાઈથી થઈ છે અને 10 જુલાઈ સુધી તેમાં રોકાણ કરી શકાશે. 

ઉલ્લેખનીય છે કે દુનિયામાં કોરોના સંકટને જોતાં ગોલ્ડને આ દિવસોમાં સૌથી સુરક્ષિત માનવામાં આવે છે. આ સરકારની સૉવરેન ગોલ્ડ બોન્ડનો ચોથો તબક્કો છે. ભારતીય રિઝર્વ બેંકે એપ્રિલમાં જાહેરાત કરી હતી કે સરકાર એપ્રિલ 2020થી સપ્ટેમ્બર સુધી 6 તબક્કામાં આ સ્કીમને બહાર પાડશે. એટલે કે સપ્ટેમ્બર સુધી તમને ડિજિટલ બોન્ડના રૂપમાં સોનામાં રોકાણ કરવાનો અવસર મળશે.

બજાર ભાવથી સસ્તું સોનું

સૉવરેન ગોલ્ડ સ્કીમમાં સોનાની કિંમત 4852 રૂપિયા પ્રતિ ગ્રામ નક્કી કરવામાં આવી છે. બજાર કિંમતથી આ સોનું ઘણું સસ્તું છે. અત્યારે બજારમાં સોનાની કિંમત 50,000ની આસપાસ ચાલી રહી છે. એટલું નહીં તેના રોકાણકારોને 50 રૂપિયા પ્રતિ ગ્રામની છૂટ પણ મળશે. જે ઓનલાઈન અરજી કરશે અને ડિજિટલ પેમેન્ટ કરશે તે આ છૂટને યોગ્ય ગણાશે. આ રોકાણકારોને માટે બોન્ડની કિંમત 4802 રૂપિયા પ્રતિ ગ્રામ રહેશે. તો તમે 48000 રૂપિયામાં 10 ગ્રામ સોનાનું રોકાણ કરી શકો છો. રોકાણ બાદ બોન્ડ 14 જુલાઈએ જાહેર કરાશે. તેના આધારે વાર્ષિક 2.5 ટકાનું વ્યાજ પણ આપવામાં આવશે.

કઈ રીતે થાય છે રોકાણ

આ સ્કીમના આધારે તમે સોનાને બોન્ડના રૂપમાં ખરીદી શકો છો. આ માટે બેંક, નક્કી કરાયેલી પોસ્ટ ઓફિસ, સ્ટોક હોલ્ડિંગ કોર્પોરેશન ઓફ ઈન્ડિયા, એનએસઈ અને બીએસઈમાં જઈને અરજી કરી શકો છો. આ બોન્ડની મર્યાદા 8 વર્ષની છે. તેમાં 5 વર્ષ બાદ અરજીની તારીખે બહાર નીકળી શકવાનો વિકલ્પ મળે છે. કોઈ પણ રોકાણકાર ઓછામાં ઓછું 1 ગ્રામ અને વધુમાં વધુ 4 કિલો ગોલ્ડમાં રોકાણ કરી શકે છે.