મનોરંજન / બ્રહ્માસ્ત્રની કમાણીના આંકડા ખોટા છે! કંગનાએ કર્યો મોટો દાવો, જુઓ શું કહ્યું

• કંગનાએ ફરી સાધ્યો ફિલ્મ બ્રહ્માસ્ત્ર પર નિશાનો 
• બ્રહ્માસ્ત્રના બોક્સ ઓફિસ કમાણીના સાચા આંકડા નથી જણાવી રહ્યા
• આ પહેલા પણ અયાન મુખર્જીને લઈને કર્યો હતો કટાક્ષ 

રણબીર કપૂર, આલિયા ભટ્ટ, નાગાર્જુન, અમિતાભ બચ્ચન, શાહરૂખ ખાન અને મૌની રોય સ્ટારર ફિલ્મ બ્રહ્માસ્ત્ર ને સોશ્યલ મીડિયામાં એક તરફ બૉયકોટ કરવામાં આવી રહી હતી પણ રિલીઝ થતાંની સાથે જ દર્શકોનો સારો પ્રતિસાદ મળ્યો છે.જણાવી દઈએ કે ફિલ્મનો પહેલો ભાગ પૂરો થતાની સાથે જ બીજા ભાગ 'બ્રહ્માસ્ત્ર 2: દેવ'નું અનાઉસમેન્ટ કરવામાં આવ્યું છે. ફિલ્મને પહેલા દિવસે શાનદાર ઓપનિંગ મળી હતી. 

બીજે દિવસે કર્યું બમ્પર કલેક્શન 
અયાન મુખર્જીની ફિલ્મ બ્રહ્માસ્ત્ર એ પહેલા દિવસે લગભગ 36 કરોડનું કલેક્શન કર્યું હતું. આ આંકડો અહીં નથી અટકતો પણ બીજા દિવસે આનાથી પણ વધુ વધે છે. એક મીડિયા રિપોર્ટ અનુસાર બ્રહ્માસ્ત્ર એ બીજા દિવસે 41.25 થી 43.25 કરોડનું કલેક્શન કર્યું છે. આ સાથે ઘરેલુ બોક્સ ઓફિસ પર તમામ ભાષાઓમાં મળીને કુલ 79 કરોડની કમાણી કરી છે. ફિલ્મની કમાણીમાં બીજા દિવસે લગભગ 20 ટકાનો ઉછાળો દેખાયો હતો. ફિલ્મ મેકર્સનો દાવો છે કે બ્રહ્માસ્ત્ર એ પહેલા દિવસે વૈશ્વિક સ્તરે કુલ 75 કરોડનો બિઝનેસ કર્યો હતો અને એ પછી બીજે દિવસે ઇંડિયન બોક્સ ઓફિસમાં 41.25 થી 43.25 કરોડનું કલેક્શન કર્યું છે. એટલે ફક્ત 48 કલાકમાં 100 કરોડના ક્લબમાં ફિલ્મ શામેલ થઈ ગઈ હતી. 

કંગનાએ ફરી સાધ્યો ફિલ્મ પર નિશાનો 
એવામાં કંગના રનૌતે ફરી એકવાર બ્રહ્માસ્ત્ર પર નિશાન સાધ્યું છે. તેણે ફિલ્મના બોક્સ ઓફિસ પર કમાણીના આંકડાને નકલી ગણાવીને પોતાની પ્રતિક્રિયા આપી છે. કંગના એ પોતાની ઈન્સ્ટાગ્રામ સ્ટોરી પર એક પોસ્ટ શેર કરી હતી અને આ વિશે તેનું રીએક્શન આપ્યું હતું. 

કંગનાએ લખી કઇંક આવી વાત 
કંગનાએ એક ટ્વિટ શેર કર્યું હતું અને એ ટ્વિટમાં લખ્યું હતું કે, 'કેટલાક ટ્રેડ એનલીસ્ટિક બ્રહ્માસ્ત્રના બોક્સ ઓફિસ કમાણીના સાચા આંકડા નથી જણાવી રહ્યા કારણ કે તેઓ તેમાં હેરાફેરી કરી રહ્યા છે. જે લોકો બોક્સ ઓફિસ નંબરો સાથેહેરાફેરી કરે છે એ લોકોને આ કામ માટે મોટી રકમ ચૂકવવામાં આવે છે. જો કે આને ભારતની અત્યાર સુધીની સૌથી મોટી હેરાફેરી કહી શકાય. જેમાં 60-70 ટકા નકલી આંકડા છે.' આ ટ્વિટ શેર કરતાં કંગનાએ લખ્યું હતું કે - વાહ, આવા લોકોનો આ એક વધુ નીચો સ્તર છે, 70 ટકા. 

આ પહેલા પણ અયાન મુખર્જીને લઈને કર્યો હતો કટાક્ષ 
આ પહેલા પણ કંગનાએ શનિવારે પોસ્ટ શેર કરીને બ્રહ્માસ્ત્રના ડિરેક્ટર અયાન મુખર્જી પર નિશાન સાધ્યું હતું, પોસ્ટમાં કંગનાએ લખ્યું હતું કે- 'જેઓ અયાન મુખર્જીને જીનિયસ કહે છે તેમને જેલમાં નાખી દેવા જોઈએ.' આટલું જ નહીં કંગના એ તો ત્યાં સુધી કહ્યું હતું કે 'અયાને બ્રહ્માસ્ત્ર માટે 600 કરોડ ખાલી ખોટા ઉડાવી દીધા.'