વિવાદ / અમદાવાદની NID બની ફી ભૂખી, કોરોના કાળમાં ફીમાં કર્યો એટલો વધારો કે વિદ્યાર્થીઓમાં આક્રોશ ફાટી નીકળ્યો

અમદાવાદની નેશનલ ઇન્સ્ટિટ્યૂટ ઓફ ડિઝાઇન કોલેજમાં એક સેમેસ્ટરની ફી 1,65,000 જેટલી વસૂલવામાં આવી રહી છે તેવો વિદ્યાર્થીઓએ દાવો કર્યો છે. નીચેના ગ્રાફમાં જોઈ શકાય છે કે આ વર્ષે કોરોનાને પગલે વિદ્યાર્થીઓને રાહત આપવાને કોલેજની ફીમાં ભારે વધારો કરી દેવામાં આવતા વિદ્યાર્થીઓ રોષે ભરાયા છે. 

આ મુદ્દે વિદ્યાર્થીઓએ ઘણી વખત સંસ્થાને કહ્યું છે પરંતુ તેમની દલીલો બહેરા કાને અથડાય છે. મોટા ભાગે વિદ્યાર્થીઓને ફીના નોટિફિકેશન પછી ફી ભરવા માટે 1 મહિનાનો સમય આપવામાં આવે છે. હવે આ મહામારીના સમય સંસ્થા ફી લેવા એટલી અધીરી બની છે કે તેઓ એક જ મહિનામાં આ ફી ભરાવવા માટે આદેશ આપી રહ્યા છે.

નોંધનીય છે કે અત્યારે એક સેમિસ્ટરમાં ફક્ત 3 વીડિયો કોલ્સ દ્વારા ગાઈડન્સ આપવામાં આવે છે. આ 3 Zoom કોલ્સના બદલામાં તોતિંગ 1,65,000 રૂપિયા ફી વસુલ કરવામાં આવી રહી છે. વિદ્યાર્થીઓને મદદ કરવાની વાત તો દૂર રહી પણ સંસ્થાએ કોર્સના અલગ અલગ સેમિસ્ટરના વિષયોને હજુ ડિજિટાઈઝ પણ કર્યા નથી.

વિદ્યાર્થીઓએ એ મુદ્દો પણ ઉમેર્યો છે કે NIDના વિદ્યાર્થીઓને સ્ટુડન્ટ લોન સરકારી બેંકો પાસેથી મળી શકે છે. આ લોન 1 અઠવાડિયામાં જ મળી જાય એ શક્ય નથી. તેમણે એમ પણ ઉમેર્યું હતું કે ઘણા વિદ્યાર્થીઓ તેમનું પ્લેસમેન્ટ નક્કી થઇ જતા NIDને ફી ભરી દેતા હોય છે. અત્યારે મહામારીના પગલે મોટાભાગના વિદ્યાર્થીઓ નોકરીથી વંચિત રહ્યા છે. એવામાં NID સંસ્થા કેમ તેમના હિતો વિષે વિચાર નથી કરી રહી એ ચર્ચાનો અને ચિંતાનો વિષય છે.