શહેરમાં ગત વર્ષના ચોમાસાની જેમ વરસાદની હજુ ઘટ છે. દર ચોમાસામાં સરેરાશ ૩૦ ઇંચ વરસાદ પડે છે, તેની તુલનામાં અમદાવાદમાં હજુ દસથી બાર ઇંચ વરસાદની જરૂર છે, જોકે આવતી કાલે શહેરમાં ભારે વરસાદ પડવાની હવામાન વિભાગ દ્વારા આગાહી કરાઇ હોય મ્યુનિસિપલ તંત્ર સાબદું થયું છે.
શહેરીજનો ગત ૩૧ જુલાઇની સાંજે પડેલા ત્રણથી સાડા ત્રણ ઇંચ વરસાદમાં ભારે મુશ્કેલીમાં મુકાયા હતા. મ્યુનિ. કોર્પોરેશનના સદ્નસીબે વડોદરાની જેમ તે દિવસે સાંબેલાધાર વરસાદ પડ્યો ન હતો અને રાતના સાડા આઠ પછી વરસાદનું જોર ઓછું થઇ ગયું હતું.
જેના કારણે હજારો અમદાવાદીઓએ હાશકારો અનુભવ્યો હતો, જોકે શહેરમાં માત્ર બેથી ત્રણ ઇંચ વરસાદમાં રસ્તા ધોવાઇને ઠેર ઠેર ખાડા પડવાનું ચાલુ વર્ષે પણ અટક્યું નથી. જે તંત્રના રોડના કામના ભ્રષ્ટાચારની ચાડી ખાય છે.
જોકે અમદાવાદીઓએ આવતી કાલે ભારે વરસાદની શક્યતા હોઇ રોડ પરના ખાડા કે વરસાદી પાણી ભરાવાના મામલે સતર્ક રહેવાની જરૂર છે. સ્થાનિક હવામાન કચેરીના જણાવ્યા અનુસાર શહેરમાં આવતી કાલે ભારે વરસાદ પડી શકે છે.
જોકે સમગ્ર અઠવાડિયું શહેરમાં હળવા વરસાદનું જોર રહેશે. દરમ્યાન રાજ્યના હવામાન વિભાગે આજથી ત્રણ દિવસ સુધી ગુજરાતમાં ભારે વરસાદ પડી શકે છે તેવી આગાહી કરી છે, જેના કારણે વડોદરા શહેર તેમજ દક્ષિણ ગુજરાતના અન્ય જિલ્લામાં તંત્રને સાબદું કરી દેવાયું છે.
રાજ્યમાં વિરામ બાદ ભારે વરસાદની આગાહી કરવામાં આવી છે. હવામાન વિભાગ દ્વારા રાજ્યમાં આજે અને આવતી કાલે વરસાદની આગાહી કરવામાં આવી છે. બંગાળની ખાડીમાં લો પ્રેશર સર્જાતા રાજ્યમાં ભારે વરસાદ પડવાની શક્યતા જોવા મળી રહી છે.
હવામાન વિભાગ દ્વારા સૌરાષ્ટ્રના કેટલાક જિલ્લાઓમાં ભારે વરસાદ પડે તેવી આગાહી છે. આમ બંગાળની ખાડીનું લો પ્રેશર હવે ડીપ્રેશનમાં ફેરવાતાં ગુજરાતમાં 9મી ઓગસ્ટથી સાર્વત્રિક વરસાદ વરસે તેવી શક્યતા છે.
વડોદરામાં વરસાદનું ફરી થયું આગમન
જ્યારે બીજી તરફ વડોદરામાં ફરી એક વખત વરસાદનું આગમન થયું છે. શહેરના સયાજીગંજ, ફતેહગંજ, અકોટા, આજવા રોડ, વાઘોડિયા રોડ અને રાવપુરામાં વરસાદ પડ્યો છે. હવામાન વિભાગે વડોદરામાં ભારેથી અતિભારે વરસાદની આગાહી કરી છે. ભારે વરસાદની આગાહીને લઈને તંત્ર એલર્ટ થયુ છે. આગાહીને લઈને તંત્રએ લોકોને કામ વગર ઘરની બહાર ન નિકળવાની અપીલ કરી છે.