લાંચ અને ખોટી જુબાની આપવાના કેસમાં સેમસંગના Vice Chairman ને થઇ સજા

સેમસંગના Vice Chairman જે. વાય. લીને સાઉથ કોરિયાની સિઓલ સેન્ટ્રલ ડિસ્ટ્રિક્ટ કોર્ટે લાંચ અને ખોટી જુબાની આપવાના કેસમાં 5 વર્ષ જેલની સજા સંભળાવી છે. ઉલ્લેખનીય છે કે આ કૌભાંડમાં માર્ચ-2017માં તત્કાલીન રાષ્ટ્રપતિ પાર્ક ગ્યુન હેની હકાલપટ્ટી કરવામાં આવી હતી. જોકે લીએ તેમની વિરુદ્ધ લગાવવામાં આવેલા તમામ આરોપોને પાયા વિહોણા ગણાવ્યા છે. જોકે લી ગત ફેબ્રુઆરી માસથી જેલમાં બંધ છે.

સાઉથ કોરિયાન ત્રીજા સૌથી વધુ ધનિક વ્યક્તિ લી સાઉથ કોરિયાના પુર્વ પ્રમુખના સારા મિત્ર હતા. ઉપરાંત લી તેના ફાઉન્ડેશન માટે ડોનેશન પણ આપતા હતા. સાઉથ કોરિયાની ન્યૂઝ એજન્સીએ રજૂ કરેલી માહિતી અનુસાર લીએ ભૂતપૂર્વ પ્રમુખને લાંચ આપી હતી. આ કેસમાં આવેલા ચુકાદા સામે લીના વકીલ દ્વારા અરજી કરવામાં આવશે તેમ જણાવવામાં આવ્યું છે. આ મામલામાં અંતિમ ચુકાદો સાઉથ કોરિયાની સુપ્રીમકોર્ટ દ્વારા આપવામાં આવે તેમ માનવામાં આવી રહ્યું છે.

લી વિરોધી દેખાવોને કારણે કોર્ટ ઉપર પણ ઘણું દબાણ હતું. આ કૌભાંડને કારણે સાઉથ કોરિયાના રાષ્ટ્રપતિ પાર્કને પણ તેમની સત્તા ગુમાવવાનો વારો આવ્યો હતો. ઉલ્લેખનીય છે કે વિરોધ પક્ષના વકીલે જે. વાય. લી માટે 12 વર્ષની સજા કરવામાં આવે તેવી માગ કરવામાં આવી હતી. હવે આ નિર્ણય બાદ પૂર્વ પ્રમુખને પણ આજીવન કારાવાસની સજા કરવામાં આવશે તેમ માનવામાં આવી રહ્યું છે.