નવી દિલ્હીઃ ભાજપ સામે ટક્કર ઝીલી શકે તેવા ઉમેદવારો પસંદ કરવા માટે દિલ્હી ખાતે કોંગ્રેસની ક્રીનિંગ કમિટીની કવાયત શરૂ થઈ ગઈ છે. મોડી રાત્રે શરૂ થયેલી ક્રીનિંગ કમિટીની બેઠકમાં કોંગ્રેસના દિગ્ગજ નેતાઓ હાજર છે. ગુજરાતની પ્રથમ તબક્કાની 89 બેઠકો માટે ઉમેદવારો પસંદ કરવા માટે પેનલોમાંથી નામ ચાળવાની કવાયત દિલ્હી ખાતે શરૂ થઈ ગઈ છે.
આજની નિર્ણાયક બેઠકમાં 89 ઉમેદવારોના નામ પર આખરી મહોર લાગી જશે. આ નામોની જાહેરાત 16 નવેમ્બરના રોજ કરવામાં આવશે.
ઉલ્લેખનીય છે કે બીજી બાજુ ગુજરાત વિધાનસભા ચૂંટણીને લઈ ભાજપે ઉમેદવારોના નામ નક્કી કરી દીધા છે. ભાજપ પ્રદેશ પાર્લામેન્ટરી બોર્ડે ઉમેદવારોના નામ નક્કી કર્યા છે. બન્ને તબક્કાના નામોની યાદી સીલ બંધ કવરમાં મોકલી દેવામાં આવી છે.
આ નામો અંગે આજે પ્રધાનમંત્રી મોદી અને અમિત શાહની આગેવાનીમાં બેઠક મળશે તથા સેન્ટ્રલ પાર્લામેન્ટરી બોર્ડની પણ બેઠક મળશે જેમાં આ તમામ નામો અંગે ચર્ચા કરવામાં આવશે. આ બેઠકમાં પૂર્વ મુખ્યમંત્રી આનંદીબહેન પટેલ હાજર નહીં રહે.
બીજી તરફ સુત્રો દ્વારા મળતી માહિતી મુજબ તમામ નામો પર સર્વ સંમિતી સધાઈ ગઈ છે. તો ડેમેજ કંટ્રોલના ભાગરૂપે સીનિયર આગેવાનોની ટિકિટ કપાઈ છે. તો 20થી વધુ બેઠકો પર એકદમ નવા જ ચહેરાની તક આપી છે. અમદાવાદની મણીનગર બેઠક પર મહિલાને ટિકિટ આપવામાં આવી શકે છે.