ભાવનગર: ગુજરાતના બારણે ચૂંટણી ટકોરા મારી રહી છે અને પ્રથમ તબકક્ના મોટાભાગના ઉમેદવારના નામ પણ જાહેર થઈ ગયા છે ત્યારે પ્રદેશ પ્રમુખ જીતુ વાઘાણી આજે પોતાનું ઉમેદવારીપત્ર ભરવાના છે.
તેઓ ભાવનગર પશ્ચિમ બેઠક પરથી ઉમેદવારી પત્ર ભરવા માટે જીતુ વાઘાણી ઘોઘા સર્કલથી ભવ્ય બાઈક રેલી યોજશે અને ગુલિસ્તા મેદાનમાં જાહેરસભા પણ સંબોધશે.
ઉમેદવારીપત્ર ભરવાના આ પ્રસંગે પ્રદેશ પ્રમુખ જીતુ વાઘાણીની સાથે રાષ્ટ્રીય અધ્યક્ષ અમિત શાહ અને મુખ્યમંત્રી વિજય રૂપાણી પણ ઉપસ્થિત પણ રહેશે.
ઉલ્લેખનીય છે કે ગુજરાત વિધાનસભાની ચુંટણી જાહેર થતાની સાથે જ દરેક પક્ષોએ પોતપોતાની રીતે ઉમેદવારોની ગોઠવણી કરવાની શરૂ કરી દીધી હતી અને વિવિધ પાર્ટીના નેતાઓ દ્વારા પક્ષનો પ્રચાર-પ્રસાર શરૂ કરી દેવામાં આવ્યો છે.
આજે ઉમેદવારી ફોર્મ ભરવાની છેલ્લી તારીખ હોવાને કારણે ભાજપ-કોંગ્રેસ સહિત અપક્ષ ઉમેદવારો પણ આજે ફોર્મ ભરવાના છે. ત્યારે ભાવનગરના ઉમેદવાર અને ભાજપના પ્રદેશ પ્રમુખ જીતુ વાઘાણીએ ગઇકાલે ખોડીયાર મંદિર ખાતે માતાજીના દર્શન કરી મંદિર મહંતના આશિર્વાદ લીધા હતા.