મિશન 2019 માટે ભાજપનો મેગા પ્લાન 2 કરોડ યુવાઓને જોડવા લોન્ચ થશે નવી એપ

ગાંધીનગરઃ ગુજરાતમાં થાપ ખાયા બાદ ભાજપે અત્યારથી જ મિશન 2019 પર જોરશોરથી કામ શરૂ કરી દીધું છે. જે માટે મિશન 2019 માટે ભાજપે નવો ગેમ પ્લાન પણ તૈયાર કરી લીધો છે. જેના દ્વારા તે દેશના 2 કરોડ યુવાઓને ભાજપ સાથે જોડશે. 

શું છે ભાજપનો 2019 માટે નવો ગેમ પ્લાન?
ગુજરાત વિધાનસભા ચૂંટણીમાં જીત બાદ પણ ભાજપે જે થાપ ખાધી છે તેનું પુનરાવર્તન 2019માં ન થાય તે માટે મોદી સરકારે અત્યારથી જ મિશન 2019નું કામ હાથ ધર્યું છે. ભાજપે લોકસભામાં જીતનો ભગવો લહેરાવવા સંપૂર્ણ પ્લાન પણ ઘડી કાઢયો છે. એવી પણ માહિતી છે કે 2019 માટે ભાજપનો પ્લાન એવા યુવા ચહેરાઓને પોતાની તરફ આકર્ષીત કરવાનો છે જેમનો જન્મ વર્ષ 2000માં થયો છે. દેશમાં આવા અંદાજીત 2 કરોડ યુવા મતદારો છે.

મહત્વનું છે કે વર્ષ-2000માં જે યુવાઓનો જન્મ થયો છે. તેઓ 2019માં લોકસભા ચૂંટણીમાં પહેલી વખત મતદાન કરશે. ત્યારે ભાજપની નજર આવા યુવા ચહેરાઓ પર મંડરાયેલી છે કે તેમને 2019 સુધીમાં કેવી રીતે ભાજપ તરફ આકર્ષીત કરી શકાય.

મહત્વનું છે કે મિશન 2019 માટે ભાજપે તૈયાર કરેલા નવા ગેમ પ્લાનમાં ભાજપની સોશિયલ મીડિયા ટીમ જોરશોરથી કામ પર લાગી ગઈ છે. આ પ્લાનને એક એપના માધ્યમથી ચલાવવામાં આવશે. જેને "મિલેનિયમ વોટ કેમ્પેઈન" નામ આપવામાં આવ્યું છે. જને 18 જાન્યુઆરીના ભાજપ દ્વારા લોન્ચ કરવામાં આવશે.

એક રિપોર્ટ પ્રમાણે ભાજપ દ્વારા લોન્ચ કરવામાં આવનાર આ એપ માત્ર નવા મતદારોને જોડવાનું કામ જ નહીં કરે. પરંતુ તેના માધ્યમથી મતદારોના ઓળખ પત્ર પણ સરળતાથી મેળવી શકાશે. ભાજપ પોતાના આ મિશનને લઈને ગંભીર પણ છે.

ઉલ્લેખનીય છે કે ગત વર્ષે જ પ્રધાનમંત્રી નરેન્દ્ર મોદીએ કહ્યું હતું કે વર્ષ 2000માં જેનો જન્મ થયો છે. તે વર્ષ 2018નો નવો મતદાર હશે. તેથી તેમનું સમ્માન થવું જોઈએ. પ્રધાનમંત્રી મોદીએ એવું પણ કહ્યું હતું કે સદીના નવા મતદારોનું ભારતીય લોકતંત્ર સ્વાગત કરે છે.

આપને જણાવી દઈએ કે 2014માં ભાજપની જીત પાછળ યુવાઓ અને મહિલા મતદારોની મુખ્ય ભૂમિકા રહી હતી. મોટા ભાગના યુવાઓ PM મોદીના સમર્થનમાં જોવા મળ્યા હતા. ત્યારે હવે 2019માં ઉભરીને આવતા નવા મતદારોને પોતાની સાથે જોડવા ભાજપે મુહિમ શરૂ કરી છે. ત્યારે ભાજપનું આ "મિલેનિયમ વોટ કેમ્પેઈન" કેટલું સફળ રહે છે તે જોવું રહ્યું.