સુરતઃ ઉપરવાસમાં વરસાદ વરસ્યો હોવાથી ઉકાઇ ડેમમાં પાણીની આવક વધતા સપાટીમાં વધારો થયો છે. ધીમી ગતિએ પાણીની આવક રહેતા દોઢ ફૂટ સુધીનો વધારો થતા સપાટી 320.37 ફૂટ નોંધાઇ હતી. સપ્ટેમ્બરમાં કુલ 274 એમસીએમ પાણી ડેમમાં ઠાલવવામાં આવ્યું છે.
મેઘમહેર ધીમીધારે વરસતા ઉકાઇ ડેમનું કેચમેન્ટમાં પાણી વધ્યું હતું. ડેમમાં સતત પાણીની આવક રહી હતી. 700 ક્યૂસેક થી 15000 ક્યૂસેક પાણી આવી રહ્યું છે. જેને લઇ સતત ડેમની સપાટીમાં વધારો નોંધાયો છે. જે સપાટી 6 સપ્ટેમ્બરે 319 ફૂટ નોંધાઇ હતી જે આજે 320 સુધી પહોંચી હતી. ખેતી માટે પ્રમાણ સર પાણી ઉકાઇ ડેમમાં ભરાઇ ગયું છે.
ઉકાઇ ડેમના કર્મચારીઓના જણાવ્યા અનુસાર સપ્ટેમ્બર મહિનામાં ઉકાઇ ડેમમાં કુલ 274 મિલીયન ક્યૂબીક મિટર પાણીની આવક થઇ. જે હજૂ 325 સુધી પહોંચવાની શક્યતા દર્શાવી હતી.
કારણ કે ઉકાઇ ડેમના ઉપરવાસમાં પ્રકાશા સારનખેડા અને સરવાડે વિયર પાણીથી ભરાઇ ગયા છે. જ્યારે હથનુર ડેમ 95 ટકા ભરાયો છે. જેથી ડેમમાંથી પાણી છોડવામાં આવી રહ્યું છે જે પાણી ઉકાઇ ડેમમાં ભરાઇ રહ્યું છે.