જામનગરના પૂર્વ કોર્પોરેટરનાં પુત્રો પાસેથી ધાક-ધમકીથી પડાવ્યા પૈસા

જામનગરઃ જામનગરમાં દિગ્વિજય પ્લોટ -૫૮ વિસ્તારમાં રહેતા અને બેડેશ્વર ઓઈલ મીલ એરીયામાં શ્રી આશાપુરા ટ્રેડર્સ નામની પેઢી ધરાવતા પુર્વ કોર્પોરેટર ચંદુભાઈ દામાના પુત્ર નવીનભાઈ ચંદુભાઈ દામા નામના વેપારી યુવાને પોતાનો પેઢીના ચોકીદાર નહોવા છતા આરોપી અબ્બાસભાઈ આદમભાઈ બેલાઈએ અવાર નવાર ચોકીદારીના નામે એક લાખ રૃપિયા પડાવી લેવા માટે ધંધાના સ્થળે ઘસી આવીને તેના પુત્ર સીદીકભાઈ અબ્બાસભાઈ બેલાઈ અને અન્ય એક અજાણ્યા શખ્સે પોતાની પેઢીમાં ગેરકાયદે લાક્ડાના ધોકા સાથે પ્રવેશ કરીને પોતાને તથા પોતાના ભાઈ વિજયને ત્રણેક કલાક સુધી ગેરકાયદે ગોંધી રાખીને  હાથ પગ ભાંગી નાખવાની ભય બતાવીને બે હજારની રકમ બળજબરીથી પડાવી લઈ જાનથી મારી નાખવાની ધમકી આપ્યાની ફરિયાદ ત્રણેય સામે પોલીસ મથકમાં નોંધાવી છે. ફરિયાદીની પેઢીના ચોકીદાર ન હોવા છતા ફરિયાદી પક્ષથી ચોકીદારના નામે એક લાખ જેવી રકમ પડાવી લેવા માટે આરોપી અબ્બાસભાઈએ અવાર નવાર ધંધાના સ્થળે ધસી આવતા હતા.

તેઓ  તથા તેના પુત્ર આરોપી સીદીકએ અન્ય અજાણ્યા શખ્સ સાથે ગઈ કાલે પેઢી ખાતે લાકડાના ધોકા સાથે ધસી આવીને બંને વેપારી ભાઈઓને ગેરકાયદે ગોંધી રાખીને ભય બતાવીને બે હજારની રકમ પડાવી લઈ જાનથી મારી નાખવાની ધમકી આપ્યાનું પોલીસ સમક્ષ જાહેર થયું છે. આરોપી અબ્બાસભાઈ બેલાઈ રોડ સાઈડના સમગ્ર વિસ્તારમાં ચોકીદારનું કામ કરતા હોવાનું પોલીસે જણાવ્યું છે.

આ બનાવ અંગે સીટી બી ડીવીઝન પોલીસે ગુન્હાહીત કાવતરૃ રચીને બળજબરીથી પૈસા પડાવવા અંગે પિતા-પુત્ર સહિત ત્રણેય સામે ગુન્હો નોંધી શોધખોળ સાથે વધુ તપાસ હાથ ધરી છે. આ બનાવના પગલે વેપારી આલમમાં ભારે ચકચાર મચી જવા પામી છે.