હાર્દિકના સમર્થકોએ વિપુલ પટેલના પૂતળુ સળગાવ્યું વિપુલના ઘરે પોલીસ બંદોબસ્ત ગોઠવાયો

હાર્દિક સીડી કાંડ શમવાનું નામ નથી લઈ રહ્યો. હાર્દિકનો આપત્તિજનક વીડિયો બનાવવા અને વાઈરલ  કરવા પાછળ સુરતના વિપુલ પટેલ અને બિમલ પટેલનું નામ સામે આવતાં હાર્દિક સમર્થકોમાં રોષ ફાટી નીકળ્યો છે. વિપુલ પટેલના ઘર આસપાસ દેખાવ બાદ સુરતના કતારગામ વિસ્તારમાં હાર્દિક સમર્થકોએ વિપુલ પટેલના પૂતળાનું  મોડી રાત્રે દહન કર્યું હતું. વિપુલ પટેલ પર હાર્દિકની કથિત આપત્તિજનક સીડી બનાવવાનો આરોપ છે. 

ઉલ્લેખનીય છે કે પાસ કન્વિનર દિનેશ બંભાણીયાએ આજે પ્રેસ કોન્ફરન્સ યોજી હાર્દિક સીડી કાંડ મામલે કેટલાક ખુલાસા કર્યા હતા જેમાં વિપુલ પટેલ ભાજપ સાથે મળી ગયો છે અને તેણે હાર્દિકની સીડી વાયરલ કરી ચે તેવો દાવો કર્યો હતો. ત્યારબાદ વિપુલ પટેલ સામે હાર્દિકના સમર્થકોએ રોષ ઠાલવ્યો છે. 

બીજીબાજુ છેલ્લા ત્રણ દિવસથી ફરાર સુરતના વિપુલ પટેલના ઘર પર પોલીસ બંદોબસ્ત ગોઠવી દેવાયો છે. મળતી માહિતી પ્રમાણ વિપુલ પટેલના ઘરે CRPFની ફોર્સ તૈનાત કરવામાં આવી છે. હાર્દિક પટેલની કથિત સીડી બનાવવાના આરોપમાં પાસ દ્વારા વિપુલ પટેલના ઘરનો ઘેરાવ કરવાની વાત કરાઈ હતી. જે બાદ તેના ઘર આગળ ચાંપતો બંદોબસ્ત ગોઠવી દેવામાં આવ્યો છે.