સાઉથ આફ્રિકાના સીનિયર બેટ્સમેન જેપી ડ્યૂમિનીએ મોમેન્ટમ વનડે કપમાં એક ઓવરમાં 37 રન બનાવીને નવો રેકોર્ડ બનાવ્યો હતો. કેપ કોબ્રા તરફથી રમતાં ડ્યૂમીનીએ એક ઓવરમાં 37 રન ફટકારીને ટીમને જીત અપાવી હતી.
નાઇટ્સ અને કેપ કોબ્રાની વચ્ચે રમાયેલી આ મેચમાં નાઇટ્સમાં ટૉસ જીતને પહેલા બેટિંગ કરવાનો નિર્ણય લીધો હતો. નાઇટ્સે 50 ઓવરમાં 9 વિકેટના નુકસાન પર 239 રન બનાવ્યાં હતાં. આ ટાર્ગેટનો પીછો કરવા ઉતરેલી કેપ કોબ્રાની શરૂઆત શાનદાર રહી હતી. પહેલી વિકેટ 80 રન પર પડ્યા પછી જેપી ડ્યૂમિની બેટિંગ કરવા માટે આવ્યો હતો. જેપી ડ્યૂમિનીએ તાબડતોબ બેટિંગ કરતાં 37 બોલમાં 70 રન બનાવ્યાં હતાં. ડ્યૂમિનીએ ઇલેઇની એક ઓવરમાં પાંચ સિક્સર ફટકારી હતી. જ્યારે ઓવરના પાંચમા બોલે 2 રન લીધાં હતાં. જોકે આ જ ઓવરના એક નો બોલ પર 4 રન આવ્યા હતાં.
આ સાથે જ મોમેન્ટમ વન ડે કપમાં નાઇટ્સ તરફથી રમનાર બોલર ઇ લેઇ એક ઓવરમાં સૌથી વધુ રન આપનાર બીજો બેટ્સમેન બન્યો છે. આ પહેલા 2013 ઢાકામાં બાંગ્લાદેશના બોલર અલ્લાઉદીન બાબુએ એક ઓવરમાં 39 રન આપીને વર્લ્ડ રેકોર્ડ બનાવ્યો હતો.
ઉલ્લેખનીય છે કે સાઉથ આફ્રિકા ટીમના અનુભવી ઓલરાઉન્ડર જીન પોલ ડ્યૂમીનીએ ટેસ્ટ અને ફર્સ્ટ ક્લાસ ક્રિકેટથી અચાનક સંન્યાસ લેવાનો નિર્ણય કરીને દરેકને ઝટકો આપ્યો હતો. ડ્યૂમિની દિલ્હી ડેરડેવિલ્સની કપ્તાની પણ કરી ચૂક્યો છે.