હવાઇ મુસાફરી દરમિયાન લોકો હવે મોબાઇલ ફોન અને ઇન્ટરનેટનો ઉપયોગ કરી શકશે. TRAIએ આ વિશે શુક્રવારે એક નિવેદન આપ્યુ કે જે અનુસાર મોબાઈલ નેટવર્કની ઉપલબ્ધતા મુજબ ફ્લાઈટમાં ઓછામાં ઓછી ત્રણ કિલોમીટરની ઊંચાઈ સુધી મોબાઈલ સર્વિસ માન્ય રહેશે. જે મોબાઈલ ઓપરેટર પોતાના વિમાનમાં કૉલ કે ઈન્ટરનેટની સુવિધા આપવા માંગે છે તેમના માટે અલગથી લાઈસન્સ લેવુ પડશે.
વાસ્તવમાં મોબાઇલ કમ્યુનિકેશન સર્વિસ ઑન બોર્ડ એરક્રાફટ નામની ખાસ ટેક્નિકની મદદથી વિમાનમાં મોબાઇલથી કૉલ કરવો અને ડેટાનો ઉપયોગ કરવો સરળ બની જશે. દુનિયાની ટોચ 30 એરલાઇન્સ તેની મદદથી પોતાના પેસેન્જર્સને કૉલ-નેટની સુવિધા આપવા લાગી છે. TRAIએ તેમ પણ કહ્યુ કે હવાઇ સફરમાં WIFIની મદદથી ઇન્ટરનેટની સેવા ત્યારે આપવામાં આવશે જ્યારે ઇલેક્ટ્રોનિક ડિવાઇસ ફ્લાઇટ મોડ પર હોય. સાથે જ આ વિશે ઘોષણા ત્યારે કરવી જોઇએ જ્યારે તમામ પેસેન્જર વિમાનમાં બેસે અને ઉડાન ભરવાની તૈયારી કરી રહ્યા હોય. આપણા દેશમાં આજની તારીખે યાત્રીઓએ ફ્લાઈટ દરમિયાન મોબાઈલ ફોન સ્વિચ ઑફ કરવો પડે છે.
TRAIએ માત્ર એક રૂપિયાના શરૂઆતના વાર્ષિક લાઈસન્સના ભાડા પર ઈન-ફ્લાઈટ સર્વિસ પ્રોવાઈડર અર્થાત્ ફ્લાઈટ દરમિયાન મોબાઈલ સંપર્ક સેવા આપતી કંપની બનાવવાનું પણ સૂચન કર્યું છે. આ માટે ટેલિકોમ કંપનીઓ સાથે વાતચીત કરવામાં આવી શકે છે. TRAIનું સૂચન છે કે આ સેવા આપતી કંપનીઓએ ભારતીય ઈનસેટ અને ઈનસેટ બહારના ક્ષેત્રમાં વિદેશી ઈનસેટનો ઉપયોગ કરવાની મંજૂરી માંગવી પડશે.