ભારે વરસાદથી મુંબઇના બેહાલ બસ-ટ્રેન સેવા ઠપ કાલે તમામ શાળા-કૉલેજો બંધ

મુંબઈ: મુંબઈ અને થાણેના જુદા-જુદા વિસ્તારોમાં ભારે વરસાદના કારણે હાલત ખરાબ થઈ ગઈ છે.  ભારે  વરસાદના કારણે મુંબઈનું જનજીવન અસ્તવ્યસ્ત થયું છે.

મુંબઈનાં ધણા વિસ્તારોમાં પાણી ભરાયા છે. બ્રાંદ્રા સ્ટેશનમાં પણ પાણી ભરાયા છે. જેના કારણે મુંબઈની લોકલ ટ્રેનોમાં મુશ્કેલી જોવા મળી રહી છે. જ્યારે વીપી રોડ પર ભારે વરસાદને કારણે લોખંડનો થાંભલો પડતા ચાર લોકો ઘાયલ થયા છે. ઘાયલોને હોસ્પિટલ ખસેડવામાં આવ્યા છે. સૌથી મોટી વાત એ છે કે વેસ્ટર્ન લાઈન પર  ટ્રેનની અવરજવર ઠપ્પ થઈ ગઈ છે. વરસાદનાં કારણે બીએમસી નિયંત્રણ રૂમ અલર્ટ પર છે.

મહારાષ્ટ્ર સરકારમાં મંત્રી વિનોદ તાવડેએ ટ્વીટ કરીને જાણકારી આપી કે કાલ ભારે વરસાદની સંભાવના હોવાના કારણે તમામ શાળાઓ અને કૉલેજો બંધ રહેશે.

BMCએ દિવાલ ઘસી પડવાની ત્રણ ઘટનાઓ શોર્ટ સર્કિટની 16 અને છેલ્લા 24 કલાકમાં 23 વૃક્ષો ધરાશાયી થવાની ઘટનાઓ વિશે જણાવ્યું છે. બીજી તરફ ભારે વરસાદના કારણે કેઈએમ હોસ્પિટલમાં પણ પાણી ભરાયા છે.

PM નરેન્દ્ર મોદીએ મુખ્યમંત્રી ફડણવીસ સાથે વાતચીત કરી મુંબઈની પરિસ્થિતિ વિશે જાણકારી મેળવી હતી. પીએમ મોદીએ કેન્દ્ર તરફથી મહારાષ્ટ્ર સરકારને તમામ પ્રકારની સહાયતા કરવા માટેનું આશ્વાસન આપ્યું હતું.