જામનગર રાજકારણમાં ભૂકંપ PAAS કન્વીનરે કેસરીયો ધારણ કર્યો

જામનગરઃ જામનગરમાં પાસ કન્વીનર અને જામનગર મહાનગરપાલિકના કોર્પોરેટર અતુલ ભંડેરી ભાજપમાં જોડાતા સ્થાનિક રાજકારણમાં ભૂકંપ સર્જાયો છે. અતુલ ભંડેરી હાર્દિક પટેલનો અત્યંત નજીકનો માણસ ગણવામાં આવે છે. આંદોલન દરમિયાન પોલીસ પર હુમલા અને તોડફોડ સહિતની અનેક ફરિયાદોના તહોમતદાર ભંડેરીને ભાજપના સ્થાનિક નેતાઓએ ખેસ પહેરાવી આવકાર્યા હતા.

કેન્દ્ર અને રાજ્ય સરકારની કામગીરીથી પ્રભાવિત થઇ પક્ષ પરિવર્તન કરી રહ્યો છું એમ ભંડેરીએ જણાવ્યું હતું. હજુ સપ્તાહ પૂર્વે જ હાર્દિક પટેલ સાથે મંચ પર બિરાજમાન અતુલ ભંડેરીને હવે હાર્દિકનું આંદોલન દિશાવિહીન લાગી રહ્યું છે.

જામનગર દક્ષિણ બેઠકના કોંગ્રેસના પ્રબળ દાવેદારની આ બગાવતથી કોંગ્રેસ ઉઘતી ઝડપાઈ હોય એમ કયાંકને કયાંક લાગી રહ્યું છે. બીજી તરફ કહ્યું હતું કે કોંગ્રેસ કોઈ હોદ્દો નહિ આપતા અને છેલ્લે વિધાનસભાની ટીકીટ નહિ આપતા કોંગ્રેસ સાથે છેડો ફાડ્યો છે.