અમદાવાદઃ અમદાવાદ મ્યુનિ. કોર્પોરેશન દ્વારા નવા બનાવેલા અને જુના રિસરફેશ કરાયેલા રોડમાં મોટાપાયે ભ્રષ્ટાચાર થયો છે. ડામર સહિતના મટિરિયલ્સમાં બેફામ ચોરીઓ થઈ હોવાનું હવે તો વૈજ્ઞાનિક રીતે સાબિત થઈ ગયું છે. વધારે તુટેલા 90 રોડમાંથી મટિરિયલ્સના નમૂના લઈને ત્રણ લેબોરેટરીમાં ટેસ્ટીંગ માટે મોકલાયા હતા.
જેમાંથી 78ના રિપોર્ટ આવી ગયા છે. તેમાંથી 74 રોડમાં ગરબડ ગોટાળાં થયા હોવાનું જણાયું છે. એટલે કે 94.87 ટકા રોડની કામગીરીમાં ગુણવત્તાનો છેદ ઉડાડી દેવાયો હતો. તુટેલાં રોડ અંગે ભારે ઉહાપોહ થતાં મામલો હાઈકોર્ટમાં પહોંચતા કમિશનર મુકેશ કુમારે આ અંગેની તપાસ મ્યુનિ.ના વિજીલન્સ વિભાગને સોંપી હતી.
જેના અધિકારીઓએ 90 રોડમાંથી ઉખડી ગયેલાં ભાગના ડામર કપચી ગ્રીટ વગેરેના નમૂના લઈને એલ.ડી. એન્જિનિયરીંગ ફોરેન્સીક અને ગેરીની લેબોરેટરીમાં ચેકીંગ માટે મોકલ્યા હતા. જેમાંથી અગાઉ 38ના રિપોર્ટ આવ્યા તેમાંથી 36માં ડામર ઓછો વપરાયો હોવાનું અને ગ્રીટકપચી જેવું મટિરિયલ હલકા પ્રકારનું હોવાનું જણાયું હતું. આ રિપોર્ટ હાઈકોર્ટમાં રજૂ થયો હતો. આજે બીજા 40 રોડના રિપોર્ટ ત્રણેય લેબોરેટરીમાંથી આવ્યા છે તેમાંથી 38માં માલની ચોરી અને હલકાં મટિરિયલનું જણાયું છે.
ઉલ્લેખનીય છે કે અગાઉ ગુરૃકુળ રોડ પર બની રહેલાં રોડમાં કાગળ ઉપર 10 ગાડીઓ બતાવી હતી. જ્યારે સ્થળ પર 8 જ ગાડી મટિરિયલ્સની પહોંચી હોવાનું વિપક્ષના નેતા અને રોડ કમિટીના ચેરમેને પકડયું હતું. ડેપો પરના રજીસ્ટરના પાના ફાડી નખાયા હતા. જેના સંદર્ભમાં કેટલાંક એન્જીનિયરોની બદલી કરાઈ હતી.